Дагъустандин СМИ-рин кьилин редакторри

Абдулмуслим Абдулмуслимовахъ галаз кар алай месэлаяр веревирдна

13-январдиз РД-дин Гьукуматдин Председатель Абдулмуслим Абдулмуслимова республикадин информациядин ва печатдин Агентстводин коллективдихъ галаз гуьруьш кьиле тухвана. Мя-рекатда гьакIни региондин СМИ-рин кьилин редакторрини иштиракна.

Гуьруьшдин эвел кьиляй премьер-министрди СМИ-рин векилриз РД-дин Кьил Сергей Меликован патай Урусатдин печатдин югъ мубаракна, абурухъ агалкьунар, чандин сагъвал, берекатар хьун алхишна.

Къейд ийин хьи, алай вахтунда РД-дин информациядин ва печатдин Агентстводин къурулушдик 28 идара акатзава. Абурун арада гьар гьафтеда урус ва милли чIаларал акъатзавай газетрин, жуьреба-жуьре журналрин редакцияр ава.

Дагъустандин СМИ-рин хилен кIва­лахдикай рахадайла, А.Абдулмуслимова “Дагъустан” РГВК-ди милли чIаларал акъатзавай телерадиопередачайриз чара авунвай вахт тIимил ва ам артухарун герек тирди къейдна. Рекъемрин чIа­лалди рахайтIа, алатай йисуз спутникдин каналдин эфирдиз милли чIаларал акъатай программайриз чара авур вахтуни 1050 сят тешкилна, радиода — 486 сят.

ГьакIни Гьукуматдин Председателди, уьлкведа кьиле физвай гьалар фикирда кьуна, алай вахтунда ватанпересвилин, эдебдинни ахлакьдин тербиядин месэлайриз гзаф фикир гана кIанзавайди лагьана. Ада гьисабзавайвал, и темадиз республикадин СМИ-ри бес кьадар фикир гузвач.

“Машгьур дагъустанвийрин кьегьалвилерикай, жергедин зарбачийрикай, карханайрин пешекаррикай, кIвалахри­кай, инвестицийрин проектар кьилиз акъу­дай чешнелу дуьшуьшрикай кхьизвай макъалайрин кьадар садлагьана тIимил хьанва. Ихьтин темайри жемиятдин гегьенш къатара еке итиж арадал гъизва. И кар чаз кIвалахдин рекьяй федеральный СМИ-ра зегьмет чIугваз­вай куь юлдашрин чешнедай аквазва”, — лагьана А.Абдулмуслимова.

Премьер-министрдин гьисабунрихъ галаз республикадин СМИ-рин кьилин редакторрикай бязибур рази хьанач, абуру ихтилат физвай темайриз газетринни журналрин чинрал лайихлу чка чара ийиз­вайди къейдна. А.Абдулмуслимова ихьтин макъалайриз гузвай майданар мадни артухарун теклифна.

РД-дин Гьукуматдин Председателди “Дагъустан” РГВК-дин кIвалахдин гьа­къиндайни бязи туьгьметар авуна. Хъсан чешне яз, ада  Карачаево-Черкесиядин “Архыз 24”, Чечен Республи­кадин “Грозный” телеканалрин тIварар кьуна.

Вичин нубатда Дагъустандин телеканалдин директор Камила Гьамзатовади каналдин адресдиз авунвай критика гьахълуди тирди къейдна. Адан фикирдалди, кIвалахдин менфятлувал, эфирдиз акъатзавай материалрин ери хъсанарун патал, сифте нубатда, гьам телевиденидин, гьамни печатдин хилен пешекаррин мажибар хкажун герек я.

“Чун идалай виликни Агентстводин регьбер Абдуразакь Абдулвагьабо­вичахъ ва кьилди квехъ галазни Да­гъустандин СМИ-рин журналистрин зегьметдин гьакъидикайни абуру та­мамарзавай кьван кIвалахдикай раханай. Гьакъикъат­дани, эхиримжи кьве йи­сан къене журналистрал ацалтзавай пар са шумуд сеферда гзаф хьанва, ам­ма мажибриз талукь яз са дегиш­вални кьиле фенвач… Республикадин гьу­ку­матди жергедин журналистрин мажибар хкажунин месэла веревирд аву­найтIа, хъсан жедай…”, — лагьана К.Гьам­затовади.

А.Абдулмуслимова РД-дин информациядин ва печатдин Агентстводин регьбер Абдуразакь Жамалутдиновал К.Гьамзатовади къарагъарай месэладин патахъай теклифар гьазурун тапшурмишна.

“Чна Дагъустанда эцигунрин хилез миллиардралди пулдин такьатар чара ийизва. Республикадин СМИ-рин къуллугъчийрин мажибар хкажун патал ­герек къведай такьатарни жагъурун ­четин кар туш…”, — лагьана А.Абдулмуслимова. Адан гафаралди, и месэла мартдин вацра республикадин бюджетдик дегишвилер кухтадай чIавуз гьялдайвал я.

Мярекатдин сергьятра аваз, “Дагестанская правда” газетдин кьилин редактор Бурлият Токболатова, “Дагъустан” РИА-дин директор Мегьамед Мегьамедов, “Табасарандин нурар” газетдин кьилин редактор Гуьлагьмед Маллалиев, “Дагъустан” ГТРК-дин директор Луиза Алиханова ва масабур рахана.

Гуьруьшдин эхирдай А.Абдулмуслимова 2022-йисуз тафаватлу хьайи журналистривни Агентстводин къуллугъчийрив шабагьар вахкана. “Лезги газетдин” кьилин редактор Мегьамед Ибрагьимов Дагъустандин Гьукуматдин Разивилин чарчиз лайихлу хьана. Къейд ийин хьи, шабагьар гайибурун арада мад­ни машгьур журналист, чи ватанэгьли Алик Абдулгьамидов (адаз РД-дин Гьукуматдин Гьуьрметдин грамота гана) ва Лезги радиодин къуллугъчияр Наира Рамазановани Нарима Жамалова (абур “РД-дин культурадин ла­йихлу работник” тIварцIиз лайихлу хьана) ава.

Агьмед Магьмудов