Дагъустан Республикадин Гьукуматдин къурулушда къуллугърал цIийи ксар тайинарна
Сергей Меликован Указдалди РД-дин зегьметдин ва яшайишдин рекьяй вилик финин министр Абдурагьман Магьмудов РД-дин Гьукуматдин Председателдин заместитель яз тайинарнава. Адал яшайишдин ва здравоохраненидин хилерин кIвалах ихтибарнава. Ам Гуниб райондин Мегеб хуьряй я.
Маса Указдалди Мурад Къазиев РД-дин Гьукуматдин Председателдин заместителдин къуллугъдикай азадна, зегьметдин ва яшайишдин рекьяй вилик финин министрвиле тайинарнава. Ам хейлин йисара республикадин гьукумдин органра жуьреба-жуьре къуллугърал кIвалахай Низами Къазиеван гада я.
Мад са дегишвал РД-дин экономикадин ва мулкар вилик тухунин рекьяй министерстводани хьанва. Анин кьиле Гьажи Султанов тайинарна.
РикIел хкин, идалай вилик Гь.Султанова РД-дин гьукуматда Новолак районда авай яхул миллетдин векилар яшамиш жедай цIийи чкадиз куьчарунин ва Ауховский район арадал хкунин месэлайриз талукь Управленидиз регьбервал гузвай. Гила и къуллугъ Новолак райондин кьил Мегьамед-Гьажи Айдиевал ихтибарнава. Гь.Султанов Новолак райондин Шушия хуьряй я.
Мадни Сергей Меликован указралди РД-дин Кьилин государстводин къуллугъдин, кадрийрин ва государстводин шабагьрин месэлайрай Управленидин начальник яз Земфира Кашкаева тайинарнава. РД-дин Кьилин къенепатан сиясатдин ва чкадин самоуправленидин начальникдин везифаяр Наталья Беламерзаевадал ихтибарнава.
Агьмед Магьмудов
