Марат Гьажибалаеваз кьейидалай кьулухъ

“Дагъустан Республикадин вилик лайихлувилерай” орден гана

14-январдиз СтIал Сулейманан районда авай чIавуз Дагъустандин Кьил Сергей Меликова Украинада кьиле физвай махсус серенжемда телеф хьайи полковник Марат Гьажибалаеван хизандал кьил чIугуна.

Зизикрин хуьре М.Гьажибалаеван диде-бубадихъ галаз кьиле фейи гуьруьшдал Сергей Меликова Ватан патал чан къурбанд авур халис ватанперес хва тербияламишунай абуруз сагърай лагьана, мад сеферда вири мукьва-кьилийриз башсагълугъвал гана.

Гуьгъуьнлай республикадин Кьили пол­ковник Гьажибалаеван диде-бубадив “Дагъустан Республикадин вилик лайихлувилерай” орден вахкана. Ватандин вилик хивевай буржи тамамардайла, акьалтIай кьегьалвални намус­лувал къалурунай кьейидалай кьулухъ М.Гьа­жибалаеваз государстводин шабагь гунин гьа­къиндай Указдал къул С.Меликова и йикъара чIугунвай.

Гуьруьшдин сергьятра аваз Дагъустандин Кьили Гьажибалаеврин хизандихъ авай дерди-балайрикайни хабар кьуна. “Яшайишда квел гьалтзавай месэлаяр чна гьялда ва чун гьамиша квев хайибурув хьиз эгечIда”, — лагьана ада.

Эхирдай Марат Гьажибалаеван дах Мугъул Гьемзебалаевича, вичи хцел дамахзавайди къейд аву­налди, республикадин Кьилиз сагърай­ лагьана­.

Марат Гьажибалаев 1977-йисан 13-мартдиз дидедиз хьана. Москвадин Высший военный командный училище акьалтIарайдалай кьулухъ, взводдин командир яз, Буйнакскда авай 136-мо­то­стрелковый бригададиз рекье туна. Къуллугъзавай вахтунда ада Чечен Республикадин мулкарал кьиле фейи дяведин гьерекатра иштиракна. Къалурай викIегьвилерай ам “Жуьрэтлувиляй” ордендиз ва государстводин маса шабагьриз лайихлу хьана.

М.Гьажибалаева гуьгъуьнлай РФ-дин Яракьлу Къуватрин кьушунрин умуми академия акьал­тIарна. Кьилдин бригададин командирдин везифаяр тамамарна. 2022-йисан ноябрдин вацра гуьгьуьллудаказ Украинада кьиле физвай махсус серенжемда иштиракиз фена.

Агьмед Магьмудов