“Лезги газетдиз” РД-дин Кьилин пресс-къуллугъди хабар гайивал, Сергей Меликова СтIал Сулейманан райондин Зизикрин хуьре авай яшайишдинни инженерный инфраструктурадин месэлаяр гьялунин жигьетдай тапшуругъар ганва. Кьилди къачуртIа, сифте нубатда гьялна кIанзавай месэлайрин арада агъадихъ галайбур ава:
— цIийи мектебни аялрин бахча эцигун, я тахьайтIа, авайбурун дараматар цIийикIа туькIуьр хъувун;
— пуд хуьр райондин центрадихъ галаз алакъалу ийизвай Курхуьр-КIварчагъ-Сиртич рехъ цIийикIа туькIуьр хъувун;
— хуьр электричестводалдини целди таъминарун хъсанарун.
РикIел хкин, алатай гьафтеда республикадин Кьил и хуьруьз мугьман хьана ва Украинада кьиле физвай махсус серенжемда телеф хьайи полковник, бригададин командир Марат Гьажибалаеван хизандал кьил чIугуна. Винидихъ тIвар кьунвай месэлаяр Сергей Меликовахъ галаз кьиле фейи гуьруьшдал рагьметлу полковникдин буба Мугъул Гьажибалаева къарагъарна.
Къейд ийин хьи, гьар са месэладин жигьетдай жавабдар ксар тайинарнава.
Чи мухбир
