Дагъустандин здравоохраненидин министерстводин пресс-къуллугъди “Лезги газетдиз” хабар гайивал, цIийи йисан вилик республикадин медицинадин 130 идарадин иштираквал аваз шекердин диабетдикай чирвилер гуниз ва адан вилик пад кьуниз талукь яз кьиле тухвай килигун-конкурсда СтIал Сулейманан райондин ЦРБ 1-чкадиз лайихлу хьана. Ам тешкилайбур Дагъустандин здравоохраненидин министерствони республикадин жемиятдин сагъламвал ва азаррин вилик пад кьадай медцентр (РЦОЗМП) я.
Конкурсда иштиракзавай медицинадин идарайри шекердин диабетдиз (ивидик квай шекердин кьадар артух хьуни арадал гъизва) — алай вахтунда гзаф инсанрик къалабулух кутазвай азардиз — талукь яз виликамаз адан вилик пад кьунихъ элкъуьрнавай серенжемрикай санбюллетень, буклет ва чирвилер гузвай макъала гьазурун, абурни чпин идарайра аниз къвезвайбурун вил акьадай чкайрал алкIурун лазим тир. ГьикI хьи, пешекаррин фикирдалди, ихьтин серенжемрихъ, яни азар деринриз фидалди адан вилик пад кьаз алакьунилай инсандин уьмуьр патал еке метлеб ава. Гзафбуруз азардин сифте лишанар чир тахьуникди ва я абур кваз такьуникди сагъламвилиз екез кьецI гудалди адакай хабар жезвач. Им лагьайтIа, рехъ гана кIанзавай кар туш. Шекердин диабет вахтунда чир хьайи дуьшуьшра диетадикай (ва лазим атай дуьшуьшра дарманрикайни менфят къачуналди) инсандин сагъламвал, къайдадикай хкуд тавуна, яргъал йисара хуьз жезвайди чир хьана кIанда. Шекердин диабет лагьанмазди, руьгьдай аватун, уьмуьрдал, лугьудайвал, “хаш” эцигун дуьз туш. Бязи пешекарри и азардиз “образ жизни” лугьузва, яни уьмуьр кьиле тухузвай къайда дегишарунихъ азардикай къутармиш хьун патал еке метлеб авайдал фикир желбзава. Мисал яз, къекъуьни ивидик квай шекер тIимиларзава. Азардиз талукь яз ихьтин малуматар гуникай гзафбур патал хийир хкатзава. Килигунин-конкурсдин макьсадни гьа им тир.
Финалда республикадин 57 медидаради иштиракна. Конкурсдин комиссияди, винидихъ къейднавайвал, 3 номинациядай гъалибчияр хкяна.ИкI, СтIал Сулейманан ЦРБ “Виридалайни хъсан макъала” номинациядай кIвенкIвечи чкадиз лайихлу хьана. 2 ва 3-чкаяр Къумторкъаладин ва Тарумовский ЦРБ-ри кьуна.
“Виридалайни хъсан буклет” номинациядай Буйнакскдин ЦГБ -1, ДРКб-2 ва Хунзахдин ЦРБ 3-чкайриз лайихлу хьана.
“Виридалайни хъсан санбюллетень” номинациядай Махачкъаладин ГКБ-ди -1, Буйнакскдин ЦГБ-ди -2 ва республикадин жаванринни студентрин сагъламвал хуьдай центради 3-чкаяр кьуна.
Чи мухбир
