Дагъустанда здравоохраненидин сифтегьан хел (первичное звено) цIийикIа туькIуьр хъувунин жигьетдай эхиримжи кьве йисуз хейлин кIвалахар кьилиз акъуднава. Агьалийрин сагъламвал хуьнин ва мягькемарунин жигьетдай и хилехъ — поликлиникайрихъ, дишегьлийрин консультацийрихъ, фельдшервилинни акушервилин пунктарихъ (ФАП) ва амбулаторийрихъ — еке метлеб авайди фикирда кьуналди, анрин гьал хъсанарунин кIвалахар “РД-дин здравоохраненидин сифтегьан хел цIийикIа туькIуьр хъувун” госпрограммадин сергьятра аваз кьилиз акъудзава. ИкI, и госпрограммадин сергьятра аваз СтIал Сулейманан райондин КIварчагъа амбулаториядин цIийи объект эцигна акьалтIарзава…
Райадминистрациядин пресс-къуллугъди хабар гайивал, цIийи йисан вилик квай йикъара райондин кьил Саид Темирханов медицинадин дарамат эцигзавай чкадал фена, кIвалахар тамамарзавай гьалдихъ галаз таниш хьана. Эцигунрин кIвалахар пландин бинедаллаз ва къалурнавай вахтара кьилиз акъудиз агакьзава. Идалайни гъейри, райондин бюджетдин гьисабдай яз дараматдиз цин ва электроэнергиядин линияр чIугунва.
Эцигунрин гьалдихъ галаз таниш хьайидалай кьулухъ Саид Темирханова райцентрадивай яргъа авай хуьрерин агьалийриз вахтунда ва ерилудаказ куьмек агакьарунин карда медицинадин сифтегьан хилен идарайрин кIвалах алай аямдин истемишунрив кьурвал тешкилунихъ хьиз, абуру тамамвилелди къуллугъар кьилиз акъудунихъни еке важиблувал авайди къейдна.
Эхирдай С.Темирханова хуьруьн кьилин ва УКС-дин начальникдин фикир амбулаториядин дараматдин патарив гвай чкаяр аваданламишунал желбна.
Чи мухбир
