Жуьреба-жуьре вакъиайралдини хабарралди, рикIерик шадвал хьиз, гьайиф хьи, дерин къалабулух кутурбуралди, имтигьанар вилик эцигайбуралди девлетлу хьайи 2022-йиса ингье тарихда чка кьуна. Лезги халкьдин тIвар гьуьндуьр дережайриз хкажзавай кьегьал рухвайризни рушариз аферин ва баркалла лугьуз кIанзава! Абурун арада чи гьар са райондин векилар ава. Чна квелди дамахзава! Куьн чи миллетдин кьилин винизвал я!
Эхь, спортдин кесерлу майданра гъалибвилер къазанмишзавай хьиз, алай вахтунда кьегьал рухвайри дяведин цIун хура уьтквемдиз акъвазна, чпин чанарилайни гъил къачуна, Ватан хуьзва, жуьрэтлувал, ватанпересвал къалурзава. Аферин, баркалла!
Арадал атанвай гзаф йисарин адетдал амална, редакцияди алатай йисуз спортдин рекье дерин гел тур 10 спортсмендин тIварар раижзава. Абур хкягъун са акьван регьят кар туш. Чахъ спортдин кьакьан кукIушар муьтIуьгъарзавай кьегьалар гзаф ава. Къуй абурун кьадарни, агалкьунарни мадни артух хьурай! Къуй алукьнавай йисуз чилел ислягьвили агъавалрай! Акъажунарни бягьсер анжах спортдин майданра кьиле фирай!
«Лезги газет»
