Жавабдар къуллугъдал алай кас баркаллуди яз гьисабиз жеда, эгер ада хайи жемят, эл патал ийизвай мергьяматлувилери и кар тестикьариз хьайитIа.
Къурушрин хуьруьн юкьван кьве школадин муаллимри аялар, хуьруьн общественность галаз гьар йисан 21-февралдиз Виридуьньядин милли чIаларин йикъаз талукьарнавай мярекатар кьиле тухуз са шумуд йис я. Абур тешкилуник Хасавюрт шегьерда жавабдар къуллугърал кIвалахзавай къурушвийрини кьил кутазва, куьмекар гузва, иштиракзава. Са бязибур виликамаз мярекатар мус, гьина ва гьикI тухузватIа чириз суракьда жеда.
Гьа ихьтин баркаллу рухвайрикай — къурушвийрикай сад алай вахтунда Хасавюрт шегьердин администрацияда финансрин управленидин начальниквиле кIвалахзавай, “Дагъустандин муниципальный къуллугъдин лайихлу работник” тIварцIиз лайихлу хьанвай, винидихъ къейд авунвай мярекат гьар йисуз Хасавюртда тешкилуник лайихлу пай кутазвай (ам а серенжемдин кьилин тешкилатчи я лагьайтIани жеда) Шагьвеледов Мегьамед Ферзалиевич я. Гьар гьи инсан хьайитIани, еке дережайрив садлагьана ваъ, вири четинвилерай экъечIайдалай, уькIуь-цуру дадмишайдалай кьулухъ агакьзава. Мегьамедазни гьа и рекьер вири акунва, ам четинвилерай лайихлудаказ экъечIни авунва.
Мегьамед Ферзалиевича са шумуд чкада финансрихъ галаз алакъалу къуллугърал кIвалахна. Виринра ада вич ихтибарвал ийиз жедай кас, хъсан пешекар тирди тестикьарна. Анжах гьа и ери сад лагьай чкадал эцигайвиляй адалай кIвалахдин рекьяй виликди физ алакьна.
Мегьамеда вичин зегьметдин рехъ “Курушский” совхоздин рабочийвилелай башламишна, кьве йисалай ам Махачкъаладин радиотоварар акъуддай заводдиз хъфена. Гележег фикирда кьуна, Мегьамед 1986-йисуз Курск шегьерда авай хуьруьн майишатдин техникумдик экечIна ва анаг бухгалтервилин пеше къачуналди акьалтIарна. Сифтедай Хасавюрт шегьерда авай алакъадин идарада инструктор-ревизор яз, гуьгъуьнлайни — кьилин бухгалтердин заместителвиле кIвалахна. Вичин пешедал кьару тир, кIелунрал рикI алай Мегьамеда Кеферпатан Осетиядин гьукуматдин университетда заочнидаказ экономиствилин пешедай чирвилер къачуна. 1994-1999-йисара идара ийидай ва бизнесдин институтда “Финансы и кредит” хиляй алава чирвилер къачун хъувуна. Мегьамеда вичин уьмуьрдин са пай кIелунрин рекье акъудна, вири санлай, школани кваз, 30 йис. ГьакI хьайила я лугьузвайди: “КIелиз садрани геж туш”. Мегьамед Ферзалиевича сифте Хасавюрт шегьердин администрацияда финансовый отделдин руководитель, гуьгъуьнлайни Хасавюрт шегьердин администрациядин финансовый управленидин начальниквиле кIвалахиз цIерид йис хьанва. Мегьамед Ферзалиевича вичин везифаяр намуслудаказ кьиле тухузва, гьавиляй ада шегьердин администрациядин, санал кIвалахзавай аппаратдин къуллугъчийрин, юлдашрин, хуьруьнвийрин патай еке гьуьрмет къазанмишнава. Вичин агалкьунриз, алакьунриз, лайихлувилериз килигна, ам 2016-йисуз “Дагъустан Республикадин муниципальный къуллугъдин лайихлу къуллугъчи” лагьай гьуьрметдин тIварцIиз, 2017-йисуз “Хасавюрт шегьердин вилик лайихлувилерай” медалдиз ва цIудралди гьуьрметдин грамотайриз лайихлу хьанва. Адахъ “Дагъустан Республикадин государстводин 3-классдин советник” чин ава. Мегьамед Ферзалиевич Хасавюрт шегьердин Собранидин галаз-галаз кьве созывдин депутатвилени хкяна.
М.Шагьвеледов хайи хуьруьхъ, жемятдихъ рикI кузвай, гьамиша кIеве авай касдиз куьмекар гун патал гъил яргъи ийиз гьазур халисан инсанперес ва ватанперес я. Алакьдай куьмекар вичи кIелай школадизни гуз рикIелай ракъурзавач. Генани башкъа, ада хайи хуьр авадан авун патал кьиле тухузвай гьи кIвалахдик хьайитIани вичелай алакьдайвал къуьн кутазва. Аферин вичиз, къуй ада ийизвай мергьяматлувилер, хъсанвилер Аллагьди кьабулрай.
Мегьамедакай рахадайла, инал заз адан чIехи стха Гьажиагьмед Ферзалиевич рикIел хкун кутугнавай кар яз аквазва. Хуьруьнвийри ам гьар гаф кватай чкадал чарадан дердиникай хабар кьадай, гьарайдиз гьай лугьудай кас хьиз рикIел хкизва. 1986-1997-йисара ада Хасавюртда кардик квай Сбербанкдин отделенидин управляющийдин заместителвиле кIвалахнай. 1997-йисалай та рагьметдиз фидалди Гь.Шагьвеледова Хасавюртда федеральный казначействодин районрин уртах къурулушдин руководителдин везифаяр тамамарна. Гьайиф хьи, 2001-йисуз Гьажиагьмед Ферзалиевич бедбахтвилин дуьшуьшдик акатна, кечмиш хьана. Аллагьди рагьметрай вичиз. Рагьметлудан кьуд хци — Алибега, Халида, Гьабиба, Кимрана бубадин тIварцIел леке текъведайвал, гьарда са къурулушда намуслувилелди зегьмет чIугвазва.
Мегьамед Шагьвеледован зегьметдал рикI хьунин, кIвалахдикай кичIе тахьунин ерияр адал диде-бубадилай агакьнавайбур я. Рагьметлу Ферзали бубани Мелек баде чпин уьмуьр хайи колхоз, совхоз патал бахшай халисан зегьметкешар яз чидай виридаз. Абур колхоздин фермайрал, совхоздин уьзуьмлухра намуслудаказ зегьмет чIугурбур, хайи майишат вилик тухун патал гьамиша вилик жергейра хьайибур я. Абур чпин веледризни гьамишалугъ чешне яз амукьна.
Мегьамед Ферзалиевичани адан уьмуьрдин юлдаш Эльмира Рамазановнади чпин хва Эмирни зегьметдал рикI алайди яз тербияламишна. Алай вахтунда Эмира Хасавюртда наркоконтролдин Управленида старший оперуполномоченный яз къуллугъзава.
Къуй хайи хуьруьн ад хкажзавай кьегьалар чахъ пара хьурай!
Гьажи Къазиев
