2022-йис тарихдиз хъфена. Гьикьван муракабди, вилив хуьн тавур имтигьанрив ацIайди хьанатIани, шаз чи халкьдин гзаф кьадар векилри — кьегьал рухвайрини рушари — яшайишдин жуьреба-жуьре хилерай цIийи агалкьунар, гъалибвилер къазанмишна.
Адет хьанвайвал, гьар йисан 1-нумрада чна абур рикIел хкизва, цIийи тIварарин сагьибар “Лезги газетдин” редакциядин коллективдин патай тебрикзава. Лагьана кIанда, газетдин са чина вири къейд авун четин кар я. Идалайни гъейри, чпикай чаз хабар авачир, цIийи агалкьунар хьанвай ватанэгьлиярни хьун мумкин я. И кардихъ галаз алакъалу яз, чна тебрикнавайбурун жергейра чпин тIварар такурбурувай хъел татун ва редакциядиз чпин агалкьунрикай малуматар рекье тун тIалабзава.
ТIварар чна алфавитдин къайда хвена гузва.
Абдулгьамид Эмиргьамзаеваз — жемиятдинни сиясатдин машгьур деятель, Ульяновскдин областдин губернатордин заместителдиз:
Кутугнава цIийи къуллугъ,
Дережа мад кьакьан хьурай!
Тамамариз халкьдин буйругъ,
Элдин рикIиз масан хьурай!
Азиза Къазибеговадиз — Вирироссиядин экологиядиз талукь шикилрин конкурсдин гъалибчидиз:
Алакьунриз авач гаф,
Уьлкведа — сад лагьайди.
Къуй ви уьмуьр, Азиза,
Хьурай бахтар галайди.
Азим Ярагьмедоваз — Замбияда РФ-дин Векилдиз, “Дуствилин ордендин” сагьибдиз:
Замбияда лезгиди
Таъсиб хуьзва Ватандин.
Къуллугъ авун гьахъдаказ
Везифа я виждандин.
Апрель Агъакишиеваз — РФ-дин МЧС-дин Ставрополдин крайда авай кьилин Управленидин начальникдин сад лагьай заместитель, къенепатан къуллугъдин генерал-майордиз:
Указдалди чIехи тир
Генералдин тIвар гана.
Кьабула чи тебрикар —
Гьакьван чIехи кар хьана.
Ариф Керимоваз — ФЛНКА-дин президентдиз, миллетрин арада алакъайрин жигьетдай РФ-дин Президентдин патав кардик квай Советдин члендиз, РФ-дин Хатасузвилин Советдин “Милли хатасузвал таъминарунин карда лайихлувилерай” медалдин сагьибдиз:
Лезги халкьдин тIвар вине кьаз,
Машгьурзава дуьньядиз къе.
Вун хьтинбур — дамахар чи —
Даим хьурай анжах кьиле!
Даурен Куругълиеваз — азаддиз кьуршахар кьунай дуьньядин ва уьлкведин дережада кьиле фейи акъажунрин гъалибчидиз, пуд сеферда “Иван Ярыгинан” Гран-придин сагьибдиз:
Пуд сеферда — пудни къизил,
Агалкьунар тахьуй тIимил.
Алад, кьегьал, мадни вилик,
Гьунарар ви тахьуй эксик!
Жабраил Гьажиеваз — дуьньядин ва Европадин дережада кьиле фейи акъажунрин, дуьньядин чемпиондиз:
Чемпиондин тIвар къачур
Кьегьал хци шадна чун.
Болгариядай хкай
Гъалибвили садна чун.
Зара Латифовадиз — Дагъустан Республикадин жемиятдинни сиясатдин машгьур деятелдиз, “Дагъустан Республикадин вилик лайихлувилерай” ордендин сагьибдиз:
Баркалла ваз, кьуьчхуьрви руш,
РикIиз чими, амалар хуш!
Халкьдин крар гьялдай чIавуз
Зайифвал гьич къалурай туш!
Зуьгьре Абасагъаевадиз — “Дидевилин ордендин”сагьибдиз:
Дидедин тIвар я чаз вине,
Инсанвилин я ам бине.
Куь веледар хьурай бахтлу,
Шадвал хьурай даим рикIе.
Имам Яралиеваз — жемиятдинни сиясатдин машгьур деятель, РД-дин Халкьдин Собранидин депутат, “Дагъустан Республикадин вилик лайихлувилерай” ордендин сагьибдиз:
Мад са орден — еке къимет,
Аллагьди ваз гурай нуьсрет.
Халкьдин къайгъу чIугвазвай хва!
Гьахъ паталди рахазвай хва!
Казим Гьасановаз — Астрахань шегьердин государстводин медицинадин университетдин кафедрадин ассистентдиз, духтур-алимдиз, медицинадин рекьяй цIийи патентдин иесидиз, илимрин кандидатдиз:
Мубаракрай, жегьил алим,
Агалкьунрин хара хьурай!
Вири къастар кьилиз фирай,
Вахъ гьуьрметар пара хьурай!
Къурбан Акимоваз — филологиядин илимрин доктордиз, Дагъустандин халкьдин писателдиз:
Мадни хци хьуй ви къелем,
Жавагьирар кхьизвай!
Чи халкьдин тIвар, чи къадим чIал
Вуна машгьур ийизва.
Радик Къулиеваз — дуьньядин ва Европадин дережада кьиле фейи акъажунрин кIвенкIвечидиз, грекринни римлуйрин жуьреда кьуршахар кьунай Хорватияда тешкилай дуьньядин чемпионатдин гъалибчидиз:
ВикIегь хва я Къурушрин
Хкаж жезвай кукIушриз.
Гъалибвилер мад хьурай,
Чан — сагъ, рикIни шад хьурай!
Рамиз Алиеваз — РФ-дин илимдин ва кьилин образованидин министерстводин правовой ва государстводин къуллугъдинни кадрийрин сиясатдин департаментдин пешекардиз, юридический илимрин кандидатдиз:
Юриствилин чириз сирер,
Кардик кутаз цIийи рекьер,
Вун гьамиша зирек хьурай,
Элдиз хайи куьмек хьурай!
Саимат Юзбеговадиз — РАН-дин ДФИЦ-дин (Дагестанский федеральный исследовательский центр) илимдин кьилин къуллугъчидиз, лезги чIалан алимдиз, Гьажибег Гьажибегован тIварунихъ галай премиядин лауреатдиз:
Дережа хуьз хайи чIалан,
Чан эцигна кIвалахзава.
Пешекар я гьакьван хъсан,
Чна квелди дамахзава!
Сегьерханум Османовадиз — СтIал Сулейманан райондин Герейханован хуьруьн 1-нумрадин юкьван мектебдин муаллимдиз, РД-дин лайихлу муаллимдиз:
Муаллимдин пешедиз
Вафалу я кIевелай.
Куьне гузвай чирвилер
Алатдач гьич рикIелай.
Таира Муспагьовадиз — Ахцегь райондин ТВ-дин директордиз, муниципалитетдин дишегьлийрин советдин председатель, РД-дин культурадин лайихлу къуллугъчидиз:
Ахцегьви руш, ширин ванцел
Шадарзавай халкьдин рикIер,
Къуй авадан лезги чилел
Артух хьурай мелни мехъер!
Шамил Мамедоваз — азаддиз кьуршахар кьунай дуьньядин ва уьлкведин дережада кьиле фейи акъажунрин гъалибчидиз, “Иван Ярыгинан” Гран-придин сагьибдиз:
На дуьньядин майданра къе
Хайи Ватан машгьурзава.
Гележегдин пагьливанриз
Хъсан чешне гьазурзава.
Шариф Шагьмардановаз — машгьур художникдиз, скульптордиз, Дагъустан Республикадин халкьдин художникдиз, Урусатдин художествойрин академиядин Гьуьрметдин грамотадин сагьибдиз:
Алакьунар ава чIехи,
Шикилриз элкъуьриз вири.
Ахцегьай тир магьир устад,
Гьар са карда хьуй вун цицIи.
Эдгар Къафароваз — медицинадин илимрин доктордиз, Чечен Республикадин государстводин мединститутдин муаллимдиз, Москвада Урусатдин “Знание” обществоди тешкилай Лекторрин Лигадин конкурсдин II сезондин гъалибчидиз:
СтIалви хва, авай камал,
Хуш я чаз ви къилих, амал.
Чи уьлкведиз машгьур хьанвай
Дамахзава элди къе вал.
Эльдар Кчибеговаз — Астрахань шегьердин государстводин медицинадин университетдин профессордиз, медицинадин илимрин доктордиз, хирургиядин рекьяй 35 патентдин иесидиз:
Мад са патент къачуна на,
Пешекарриз герек жедай.
Миграгъай тир духтур, алим
Гьар са карда куьмек жедай.
Энвер Набиеваз — Украинада кьиле физвай махсус серенжемдин иштиракчидиз, Урусатдин Игитдиз, “Дагъустан Республикадин вилик лайихлувилерай” ордендин сагьибдиз:
Кьегьалвилиз чIехи къимет —
Игитдин тIвар хьана кьисмет!
ВикIегь майор, Ватандин хва,
Мубаракрай Игитдин Гъед!
Ямин Мегьамедоваз — диндин рекьяй алимдиз, Мединада 10 агъзур экземплярдин тираж аваз акъатнавай “Пак Къуръандин манайрин таржума лезги чIалал” ктабдин дилмаждиз:
ЧIугунва на чIехи зегьмет,
Халкьдиз зурба савкьат я им.
Хуьзвай руьгьдин милли девлет
Ваз аферин, диндин алим!
“Лезги газетдин” редакциядин коллективдин
тIварунихъай тебрикар кхьейди Мегьамед Ибрагьимов я.
