Алатай йисуз Дагъустанда тумар цазвай майданрин кьадар 12 агъзур гектардин артух хьана
2022-йисуз Дагъустандин аграрийри хуьруьн майишатдин техникадин 300 уьлчме маса къачуна. Абурун умуми къиметди 632 миллион манат пул тешкилна. “Лезги газетдиз” РД-дин хуьруьн майишатдин ва суьрсетдин министерстводин пресс-къуллугъди хабар гайивал, 2021-йисав гекъигайтIа, и рекъем 17 процентдин хкаж хьана.
РД-дин хуьруьн майишатдин ва суьрсетдин министрдин сад лагьай заместитель Шарип Шарипова къейд авурвал, республикадин АПК-дин хел техникадалди бес кьадар таъмин туш. И месэладиз региондин гьукумдин кьилевайбуру кьетIен фикир гузва. Кьилди къачуртIа, Сергей Меликова Урусатдин АПК-дин хел вилик тухунин рекье кар алай институтрикай сад тир “Росагролизинг” АО-дихъ галаз икьрар кутIуннава. Ам кьилиз акъудунин сергьятра аваз 2022-йисуз маса къачунвай техникадин кьадар саки 50 процентдин гзаф хьана.
“Дагъустандин аграрийрин сектордихъ еке мумкинвилер ава. Хуьруьн майишатдин вири хилерай, 2021-йисав гекъигайтIа, шаз хъсан нетижаяр къазанмишнава. И карда майишатар бес кьадар техникадалди таъминарунихъ еке метлеб ава. И месэла региондин аграрийрин сиясатдани кар алайбурукай сад я. И жигьетдай кьиле тухузвай кIвалахдин еришар эхиримжи вахтара йигинарнавайдини къейдна кIанда. Месэла гьялунив и къайдада эгечIуни алатай йисуз тумар цазвай майданрин кьадар 12 агъзур гектардин артухардай мумкинвал гана. Къенин юкъуз республикада тумар цазвай майданри, санлай къачурла, 372 агъзур гектар тешкилзава”, — лагьана Шарип Шарипова.
Чи мухбир
