Дагъустандин транспортдин ва рекьерин майишатдин министерстводин пресс-къуллугъди хабар гузвайвал, цIи милли “Хатасуз ва хъсан еридин рекьер” проектдин сергьятра аваз республикада 6 муьгъ цIийикIа туькIуьр хъувуна.
Абурун жергеда СтIал Сулейманан районда республикадин метлеб авай “Мамраш-Ташкапур-Араканский муьгъ” ва “Бабаюрт-Гребенская” шегьре рекьера гьалтзавай муькъвер ава. Къейд ийин хьи, эхиримжи шегьре рекьи Бабаюрт ва Хасавюрт районрин арада улакьрин алакъа хуьзва.
Идалайни гъейри, СтIал Сулейманан райондин Кьасумхуьрелни Сийидхуьре цин турбаяр тухвана, муьгъ цIийикIа туькIуьр хъувуна, къир цана ва тротуарар аваданлу авунва.
* * *
РД-дин транспортдин ва рекьерин майишатдин министерстводин государстводин программадин сергьятра аваз Докъузпара ва Ахцегь районра “Мегьарамдхуьр-Ахцегь-Рутул” шегьре рекьин 54-75 километрдин участок цIийикIа туькIуьр хъувунва.
Авунвай кIвалахрикай рахайтIа, шегьре рекье цIийи кьилелай къир цана, рекьин къерехар мягькемар хъувуна, яд авахьдай махсус чкаяр туькIуьрна, улакьрин гьерекатдиз талукь махсус лишанар эцигна, рекьин хуьрерин мулкарай фенвай участокра эквер тунва ва са жерге маса крар кьилиз акъуднава.
«Лезги газет»
