29-декабрдиз Дагъустандин Кьил Сергей Меликова республикадин призывдин комиссиядин заседание кьиле тухвана. Адан сергьятра аваз Дагъустанда призывдин кампаниядин нетижаяр кьуна ва Украинада кьиле физвай махсус серенжемда иштиракзавайбурун хизанриз куьмекар гунин месэлаяр веревирдна.

Сергей Меликова хабар гайивал, виликамаз авай малуматралди, зулун призывдин кампания тайинарнавай вахтунда ва хъсан дережада аваз кьиле фена. Ада гьакIни уьлкведин армиядин жергейра къуллугъзавай дагъустанвийри чпин хивевай буржи намуслувилелди кьилиз акъудзавайди ва гзаф рекьерай чешне къалурзавайди къейдна.

Республикадин Кьили Украинада кьиле физвай махсус серенжемда иштиракзавай дагъустанвийрин кьегьалвилерикайни лагьа­на. Адан гафарай малум хьайивал, женгера къалурай викIегьвилерай саки 500 дагъус­танви жуьреба-жуьре шабагьриз лайихлу хьанва: 220 касдиз — “Жуьрэтлувиляй” орденар, 5 касдиз Урусатдин Игит лагьай тIвар ганва.

Армиядин жергейра къуллугъуниз эвер гунин жигьетдай республикада тешкилай­ кIвалахдикай гегьеншдиз РД-дин военный комиссар Дайтбег Мустафаева ихтилатна.

РД-дин Халкьдин Соб­ранидин Пред­седатель За­ур Аскен­дерова призывдин кам­паниядин сергьятра аваз депутатри тухвай кIва­лахдикай малуматар гана.

Украинада кьиле физвай махсус серенжемда иштиракзавайбурун хизанриз яшайишдин рекьяй гузвай куьмекрикай РД-дин зегьметдин ва яшайишдин рекьяй вилик финин министр Абдурагьман Магьмудова суьгь­бетна. Ада къейд авурвал, вири хизанрив 100 агъзур манатдин кьадарда аваз са сеферда гузвай пулдин куьмек агакьнава.

Сергей Меликова алава хъувурвал, Да­гъус­танди ДНР-дин, ЛНР-дин, Запорожьедин, Херсондин агьалийриз, женгера иштиракзавай аскерриз 2586 тонндив агакьна недай-хъвадай суьрсет, пек-партал, яшайишда герек къведай маса затIар рекье тунва. Адан гафаралди, мергьяматлувилин и серенжем давам жеда.

Чи мухбир