Эхиримжи вахтара “Лезги газет” кхьинин ва ам кIелунин ашкъи-гьевес артух хьанвай зун хьтин ксар мадни ава жеди. Газетдихъ галаз дуствилин ала­къа хуьзвайбурун кьадар артух хьун, аниз макъалаяр ракъурзавай­бурун арада цIийи тIварарни акун мадни шад жедай кар я. Ахьтин ксарикай сад вичин ери-бине ЦIийи Макьай тир Масуб Магьмудов я. Ада газетдин чинрилай акьуллу, тамам фи­кирар, таъсирлу меслятар агакьарзава. “Лезги газет” кхьена, ашкъидивди кIел­­­­за­­вайбуруз аниз акъатзавай гегьенш ­материалри шагьидвалзавайвал, ам чирвилерни алакьунар авай (мате­матик я) кас тирди аквазва.

Гзаф михьивал, къайда, инсанвилин низам гвай  касни тирди алава хъийиз кIанзава заз. Адан биографиядал яргъалди акъваздач, амма яргъал йисара М.Магьмудова Россиядин армиядин жергейра къуллугъайди, анай полковникдин чин къуьнераллаз хтанвайди къейд тавуна жедач. Алай вахтунда вичин алакьунар, чирвилер и касди жегьилриз ватанпересвилин, инсанпересвилин тербия гуниз серфзава. И карни адан гьар йикъан кIва­лах­рай хъсандиз ашкара жезва. Винидихъни къейднавайвал, гьа са вахтунда ада вич журналистикадани ахтармишзава. Нетижаяр шадвал кутадайбур я. Газетриз акъатнавай адан “Лайихлу гьуьр­метдин сагьиб”, “Эминан сурал”, ­“Му­къаятвал”, “Жуьрэтлувал квадарнач” ва хейлин маса макъалаяр кIелза­вай­буру разивилелди кьабулнава, адан тIварцIихъ тарифдин гафар лугьузва.

— За алакьдай кьван вахтунда жува­н­ хайи халкьдин патахъай къайгъударвал чIугун акъвазардач. Исятда чун хьтин агъсакъалрин везифа жегьилриз дуьзгуьн тербия гун, абур дуьз рекье хьуник жуван пайни кутун я, — лугьузва М.Магьмудова.

ГьакI хьайила, ам мукьвал-мукьвал мектебриз, аялрин бахчайриз, спортдин мярекатриз, гьукумдин идарайриз физва, гуьруьшар тешкилзава. ИкI, са тIи­мил вахт идалай вилик Масуб Магьмудов  куьрхуьруьн Мирзекерим  Рагьимован тIварунихъ галай юкьван мектебдиз атана, аялрихъ, муаллимрихъ галаз таниш хьана, вич атунин себебдикай — виликрай хуьр хьайи чкайрикай ва къенин Курхуьруькай видеофильм гьазуруникай — лагьана.

Школадин муаллимрихъ, коллективдихъ, аялрихъ галаз таниш хьайидалай кьулухъ ам хуьруьн администрациядин кьил Радик Гьажалиеваз мугьман хьана. Ада администрациядин кIвалах­ри­кай, жемят квел машгъул ятIа, хуьруьн сергьятдай КIварчагъ дередиз физвай рекье къир цун кьиле физвай гьалдикай ва маса крарикай суьгьбетарна.

Гуьгъуьнлай М.Магьмудов хуьруьн мулкара авай машгьур чкайрихъ галаз таниш хьана, абурун шикилар яна.

Райсудин Набиев, пенсияда авай муаллим