Малум тирвал, РФ-дин Гьукуматди 2021-йисан 13-сентябрдиз 1547-нумрадин къанундин бинедаллаз тестикьарнавай къайдайралди Россиядин регионра икьван гагьда, газдин линияр аваз, газ тухуз тахьанвай кIвалериз кIвалин иесиди гайи заявкадин бинедаллаз адан участокдин сергьятдал кьван пулсуз газдин линияр чIугвазвай социальный программа кардик ква.
И программадик Дербент райондин Белиж поселокни акатнава. Чун и йикъара поселокдин Наврузбег Абдулагъаеван куьчеда газдин линия чIугвазвай газпромдин са бригададин бригадир Вадим Абдулаевахъ галаз таниш хьана. Ада “Газпром газораспределение Дагестан” ООО-дин Дербент районда авай ЭГС-дин (эксплуатационная газовая служба) отделенида кIвалахзава. И отделенидин кьве бригадади заявкаяр ганвай белижэгьлийрин кIвалериз газдин линияр чIугвазва. Чун инал атай юкъуз бригада машинар физвай кьилин куьчеда эцигдай арка гьазурунал машгъул тир. Бригадир Вадим Абдулаеван гафаралди, абуру ина кIвалахиз са гьафтедилай гзаф я.
— Чна чи кIвалах Алирза Саидован тIварунихъ галай куьчедилай гатIунна, -лугьузва ада. — И куьчеда, заявка гана, социальный программадик экечIнавай агьали яшамиш жезва. Идалай гуьгъуьниз чна газдин линия Молодежный, Наврузбег Абдулагъаеван тIварунихъ галай куьчейриз чIугуна. Газ тухузвай турбаяр чна, сифте хъипи шир яна, гьазурна. Шир кьурайла, 100 диаметрдин турбаяр кьилин куьчедин (Н.Абдулагъаеван) кьве патайни ва 57 диаметрдин турбаяр гъвечIи куьчейриз чIугуна. Санлай къачурла, и объектдал заявкаяр ганвай кьуд-вад кIвал патал 630 метр мензилдиз газдин турбаяр чIугунва. Сварщикрин, слесаррин ва монтажникрин муьжуьд касдикай ибарат бригадади зегьмет чIугвазва.
Адан гафаралди, Н. Абдулагъаеван куьчедин юкьвал кьван чIугунвай газдин линиядикай ана яшамиш жезвай маса агьалийривайни менфят къачуз жеда. Куьчедин муькуь паюна амайбуру талукь къайдада заявкаяр гайитIа, газдин линия куьчедин эхирдал кьван тухуз регьят жеда. Ада бригадада гьакъисагъвилелди зегьмет чIугвазвай сварщик Агьмед Кабашеван ва монтажник Абдулжелил Идрисован тариф авуна.
Инал чал газ вичин участокдин сергьятдал кьван тухуз заявка гайи агьали Рашид Абасов гьалтна. Адан гафаралди, икьван гагьда, газ авачиз, абуру кIвале кIарасар, къванцин цIивин кузвай. Гила газ кутурвалди кIвале, чими хьана, къулай шартIар арадал къведа, — лугьузва ада. — Гьукуматдин гьисабдай зи участокдин сергьятдал кьван газ гъун зун хьтин мумкинвилер авачир гзаф инсанриз кьезилвал я. Гадайриз машаллагь, хъсандиз кIвалахзава.
Дугъриданни, са куьруь вахтунда абуру чпин планда авай кIвалахар акьалтIарзава.
Къагьриман Ибрагьимов
