—        Евпатория Крымда, ЧIулав гьуьлуьн къерехда авай гъвечIи, гуьрчег ва къулай шегьер я. Ана 108 агъзур кас яшамиш жезва. Шегьердин умуми майдан 65 квадратный километрдикай ибарат я.

—        Евпатория Россиядин лап къадим шегьеррикай сад я. Адан «яшар» 2,5 агъзурдалай алатнава.

—        Евпаториядин архитектура полуостровдин муькуь шегьеррилай тафаватлу жезва. Кьилди къачуртIа, и шегьерда къадим грекрин, скифрин, эрменийрин ва маса халкьарин памятникар ама. Ана авай дараматарни жуьреба-жуьребур, тикрар тежербур, ял ягъиз къвезвайбурун фикир желбзавайбур я.

—        Шегьерда ял ягъунин вири шартIарни къулайвилер ава.

—        СССР-дин девирда Евпаториядихъ вири Союздин метлебдин аялрин чешнелу курортдин дережа авай.

—        Ватандин ЧIехи дяведин вахтунда 1941-йисуз и шегьер немсерин кьушунри кьуна ва 1944-йисуз анаг азад хъувуна.

—        Евпаторияда пляждин сезон майдин эхирдилай октябрдин эвел кьилелди давам жезва.

—        Шегьердин юкьвал анин бине кутурбурун памятник, гьакIни Пушкинан театр ала. Шегьердикай сифте яз рикIел хкунар турди Геродот яз гьисабзава.

—        Крымдин виридалайни еке ва машгьур мискIин Евпаторияда ава.

—        Евпатория михьи гьава, гьуьл, гуьрчег тIебиат авай шегьер я.

—        Ахтармишунри тестикьарнавайвал, са сеферда Евпаториядиз ял ягъиз фейибурун 70 процент мад сеферда аниз хъфизва.

«Лезги газет»