Цин ЧIулав Къуьрен йис

Алатай кьве йис дуьньядин халкьар патал четинбур, туькьуьлбур хьана. Хабарсуз Китайда пайда хьайи ва ахпа вири дуьньядиз чкIай тIугъвалди (коронавирусди) гзаф ин­санар къирмишна, миллионралди больницайриз аватна. Идан гуьгъуьналлаз гзаф уьлквейра шей акъудзавай карханаяр акъваз хьана, гзафбур инфляциядин къурхулувилик акатна. Экономикадин еришар зайиф хьана. Идахъ галаз — агьалийрин яшайишни. Ихьтин гьалариз, са рахунни алачиз, тIугъвалди ва дуьньядин хейлин государствойра тIебиат­дин татугай ва бедбахтвилин дуьшуьшри, шартIари таъсирна. Халкьдин майишатдин сагъ хилер къайдадикай хкатна. Эгер 2021-йис уьмуьрдикай, сагъламвиликай къурху аваз фенатIа, 2022-йисуз карчи алем патал товарар кьит хьана, зегьметчи инсанар са гьалда кьванни яшамиш хьун патал пулдин такьатар бес тежез амукьна.

Ингье 2023-йис, Цин ЧIулав Къуьрен йис, алукьзава. Ам гьихьтинди жеда? Дуьнья, чи уьлкве, республика, гьар са кас патал? Идан гьакъиндай астрологри, экономистри, политикри, аяндарри чпин фикирар лугьузва. Гзафбуру Вангадин аяндарвилин, кьилел къведай крар виликамаз лугьуз хьайи дишегьлидин ихтилатар рикIел хкизва, абурукай гегьеншдиз кхьизва. Адан гафар ахтармишунал датIана машгъул жезвай ксари малумарзавайвал, 2023-йисуз Вангадин аяндарвилин са шумуд ихтилат гьакъикъатдиз элкъведа. Абур чазни чир хьайитIа, пис туш.

Вангади лагьайвал, 2023-йисуз Чилин орбита 4-6 градусдин чкадилай юзадалда. Ида зурба дегишвилерал гъидач, амма алимар фикирдик кутада, абур алемдин гележег саламатдиз хуьдай рекьерихъ къекъведа, герек серенжемар кьабулда. Винидихъ къейднавай дегишвили планетадал чимивил артухарун мумкин я.

РАН-дин космос ахтармишзавай институтдин алимри къейдзавайвал, Чилин орбита жуьреба-жуьре вахтара дегиш хьун мумкин я. Тарихда ихьтин крар хьанва. Ихьтин гьалди зурба бедбахтвилер арадал гъизвач. Орбита алай чкадилай 4-6 градусдин юзун са акьван еке месэла туш.

Вангадин аяндарвилин ихтилатра 2023-йисуз тIугъвалдик ва дяведин гьерекатрик гзаф инсанар телеф жедайдакайни лагьанва. Чазни аквазвайвал, тIугъвалди мад вичин­ зиянлу, зегьерлу кьил хкаж хъувунва. Сифте нубатда мад — Китайда. Маса уьлквей­рани коронавирусдик начагъбур гзаф хъжезва. Гьа са вахтунда инсанар кIеве твазвай маса зиянлу вирусарни пайда хьанва. США-ди, Рагъ­акIидай патан уьлквейри яракьралди, долларралди таъминарзавай Украинади дяведин гьерекатар акъвазаруникай фикирзавач. Авайбурал алава яз, Россиядиз акси уьлквейри аниз мадни яракьар, аскерар рекье твазва.

Вангади Россиядин халкьдиз, адан геле­жегдиз талукь яз кьилел къведай гзаф крари­кай лагьанва. ГьакI — 2023-йисаз талукь язни.

Вангади гьисабзавайвал, Россиядин гележег экуьди жеда. Амма Россиядиз аяндарди хиве кьунвай галайвилер аквадалди, дуьнья хейлин къалмакъалрай, дяведин гьерекатрай, пачагьлугърин кьилера авайбур дегиш хьунрай экъечIуниз мажбур жеда. “ЧIехи стха чарадан чилел къведа ва вичинди тир чил вахчуда. РагъакIидай патай атай душманри виш йисара чпинди яз гьисабзавай чилерин иесивал хъийида”,- лагьанва Вангади.

Ахтармишунардайбуру къейд ийизвайвал, “чIехи стха” гафар — Россиядиз, “душманар” Польшадиз, Венгриядиз ва Румыниядиз талукьбур я. Вангади гьисабайвал, дяведин серенжем себеб яз, чилер пайи-паяр авуни виликдай авай государство квадарда ва адан чилерин иесиярни масадбур жеда.

Лугьун лазим я хьи, Украинада кьиле тухузвай военный махсус серенжем куьтягь хьунал чи уьлкведин гьар са агьалидин вил ала. Вучиз лагьайтIа, чи халкьариз дявеяр, адан къурбандар тIимил акунач. Гьавиляй абур гьамиша ислягь уьмуьрдихъ цIигел я. Идан гьакъиндай астролог Татьяна Борща алукьзавай йисуз дяведин гьерекатар эхирдиз къведайдакай лугьузва.

— Гъалибвал чи пата ава. ИкI жедайди гзафбуруз, чи душманризни чизва. Амма абуру Зеленский яракьралди, долларралди ацIу­руни къалмакъал яргъал вегьезва. 2023-йисан апрелдиз махсус серенжем акьалтIда. Ам я дуьньядин нубатдин дяведизни элкъведач. США, РагъакIидай пад ядерный дяведин терефдарарни туш. Махсус­ серенжем куьтягь хьанмазди, уьлкве йигин еришралди адетдин уьмуьрдив эгечI хъийида. Исятда кьиле физвай вакъиайри Европадин экономикадиз чIуру патахъай таъсирда, Евросоюздиз Россия кIеве тваз кIан хьана­тIани, абурун чIуру мурадар кьиле фидач.

“Фад тахьайтIани, дяве куьтягь жеда, инса­нар ислягь уьмуьрдив эхгечIда. Ахпа къад йи­суз давам жедай еке къалмакъал арадал къведа ва эхирни чIехи чил секинвилик акатда”, — Болгариядин аяндардихъ ихьтин гафарни ава.

США-дин гьакъиндай лагьанвай гафарни фикир желбдайбур я. Вангадин гафаралди, Цин ЧIулав Къуьрен йис США патал пехилвалдай хьтин хъсанди жедач.  “Яру Аждагьандин таъсир екеди хьайила, Америкади дуьньяда ийизвай шагьвилин эхир жеда”. Яру Аждагьан Китай я. Дугъриданни, эхиримжи йисара, маса уьлквейрин экономикадив гекъигайла, дуьньяда Китайдин лайихлувилер виле акьадайбур я. Шагьвилихъ галаз сад хьиз, США-дин валютадин дережани агъуз аватда, уьлкведа сиясатдин кризис арадал къведа. Америкадин агьалийри чпин гьукуматдихъ виликдай хьиз ихтибар хъийидач. Бейкаррин кьадар виниз акъатда.

Эгер чна алатай йисан прогнозар рикIел хкайтIа, Вангадин вири гафар дуьзбур хьана. “Дуьньядин майданда куьгьне къайдаяр квахьда ва цIийибур арадал къведа. Иллаки — РагъакIидай патан уьлквейра ва США-да. США-ди Россиядихъ галаз бягьс чIугун дава­марда, ам Россиядин къенепатан крарик къаришмиш жез алахъда. Россияни кисна акъваздач, ада вичиз аксивалзавай государст­войрив кутугай жаваб ахгакьарда”, — лагьа­най­­ аяндарди. 2022-йисуз, чаз акурвал, и агьвалатар вири кьилел атана. США-дин пацук акатнавай Евросоюзди чи уьлкведиз агъзурралди санкцияр малумарна, Украинадин мил­­летбазар Россиядихъ галаз дяве ийиз гьазурна, абуруз вири рекьерай куьмек гузва. Са рахунни алач, и татугай гьаларихъ эхир ава ва Россия и дяведин, къадагъайрин гьерекатрай, душманвилин эгечIунрай мадни къуватлу хьана экъечIда.

Алай вахтунда вири дуьньядин агьалияр рак азардикай икрагь хьанва. Гьар йисуз адакди агъзурралди инсанар рагьметдиз физва. Вангади и азардин гьакъиндайни вичин фикир лагьанва. 2023-йисуз алимар ракдихъ галаз алакъалу месэла гьялдай рекьериз мукьва жеда. Яни алимрилай ракдиз акси вакцина гьазуриз алакьдалда. И карни яргъал­ алай хьтинди туш. Са шумуд компанияди рак­диз акси вакцина акъудиз гьазур тирдакай малумарнава.

Идан гьакъиндай Индиядин астролог Аджай Бхамбидихъ вичин фикирни ава. “2030-йисав агакьдалди, инсаниятдиз СПИД-дикай, ракдикай къурхулувал амукьдач. Инсандин зигьин, акьул и пис азаррал гъалиб же­да. Россиядин гележегдикай рахайтIа, ви­ри пайгардик ахкатда, крар хъсанвилихъ элкъведа. Россияди вири алем гьейранарда ва ам дуьньядин майданда башчийрин дережадиз экъечIда”,- лугьузва Аджая.

Индиядин тIвар-ван авай пайгъамбар Абигья Ананда тестикьарзавайвал, алай вахтунда кьиле физвай астрологиядин вакъиайри инсаниятдин тарихда еке дегишвилер арадал гъида ва инсанри алемдин виликан къайдайрал амал хъийидач.

Индиядин астрологрин фикирдалди, Россия бахтавар девирда арадал атана ва адал алай тIварни Магълуб тежерди я. 2021-йисан­ зулухъ НАТО-ди вичин къуватар Россиядин сергьятриз мукьва авуна. Алай йисан февралдин вацра махсус серенжемдив эгечIна ва гьалар къизгъинбуруз элкъвена. Гзаф кьадар къадагъаяр себеб яз, кIевени гьатна. Ам­ма 2024-йис алукьдалди вири куьтягь жеда. Гуьгъуьнин 16 йисуз уьлкведи цуьк акъудда ва агьалийрин яшайиш хъсанди жеда.

Экономикадиз талукь яз аяндаррив гвай ихтилатар са акьван хъсанбур туш. ЦIийи йисан сифте варцара ВВП-дин дережа агъуз аватдалда. Зегьметдин базардани крар пис патахъ элкъвезва. Хуьруьн майишатдин суьр­сет гьасилзавай карханайрихъ, майишатрихъ галаз алакъалу тушир хилера гьар вацра бейкаррин жергейра 34-38 агъзур кас гьат хъийида. И кардиз сифте нубатда энергетикадин, газдин, нафтIадин къиметар хкаж хьунихъ галаз алакъалу яз производстводин гзаф карханаяр чпин майданар тIимилардай чкадал атуни таъсирда.

Саки вири астрологар къведай йисуз дуьнь­ядин гегемон дегиш жедайдахъ ва къал-макъалар арадал къведай вилаятар артух жедайдахъ инанмиш я.

Къуй а къалмакъалар ерли тахьурай, арадал атайтIани, чи уьлкведивай — лап яргъара. Заз инанмишвал ийиз кIанзава хьи, алукьзавай кIвалин Къуьрен йисуз, ам секин гьайван я кьван, Украинада тухузвай махсус се­ренжемни акьалтIда, уьлкве ислягь уьмуьр­­див эгечI хъийида. Гьукуматди, чи хал­кьари экономика, яшайиш, культура вилик тухуниз, агьалийрин дуланажагъ авайдалай хъсанаруниз кьилин фикир гуда, и крар патал гьакъисагъвилелди зегьмет чIугвада.

Эгер кьилди инсанрикай рахайтIа, Къуьрен йис зодиакдин вири лишанар патал имтигьанринди жедалда. Дуьньяда кьиле физвай татугай вакъиайриз, агьвалатриз са артух фикир гун тийиз, жуван кардал рикIивай машгъул хьун герек я. Ацалтзавай имтигьан­риз жа­ваб гудай къастни, викIегьвални хьайи­тIа, мадни хъсан я. Гуьгьуьлар гумрагьбур яз, къени ва бегьерлу крарик кьил кутуна кIан­да, абур кьилиз акъуддайвал. Масадаз писвал авуна, жуван кар туькIуьрдай фикирривайни яргъа  хьана кIанда. Ихьтин гьаларал амал ийиз хьайитIа, вири йис хъсандиз кьиле фида.

Экономикадиз, яшайишдиз талукь яз аяндарвилин ихтилатар ийизвайбуру инсанривай, пуларихъ галаз алакъалу гьерекатар ийи­­дайла, мукъаятвал, дикъетлувал истемишзава. Пул ужуз хьунин, инфляциядин кьа­да­рар виниз акъатунин къурхулувал фикирда аваз, агьалийриз хсуси пулар кIвализ, хизандиз менфят хкатдайвал, бизнес вилик тухудайвал ишлемишун, рикIел атай кар авуна, пул авачиз амукь тийидайвал авун меслятзава.

Къуьрен йисуз хайибурухъ яратмишунин жигьетдай еке мумкинвилер ава. Абуру чеб маса инсанрихъ галазни хъуьтуьл рафтарвилелди тухуда, гьуьжет алай месэлаяр регьятдиз гьялда, къалмакъал квай гьалар кьезилариз чалишмишвалда. Къуьрен йисуз хайибур дикъетлубур,  кIелнавайбур, савадлубур я, абурухъ галаз гьар са месэладикай суьгьбет ийиз жеда.

КIвалин Цин Къуьрен йисуз хайибур бахтуни гуналди, чеб чпихъ инанмишвилелди, са бязи крар виликамаз чир хьуналди тафаватлубур я. И йисуз дуьньядин майданда лап машгьур хьайи инсанар дидедиз хьана: алимар — Альберт Эйнштейн, Мария Кюри, манидарар — Эдит Пиаф, Уитни Хьюстон, режиссерар — Квентин Тарантино, Эльдар Рязанов, Андрей Звягинцев, актерар — Брэд Питт, Евгений Моргунов, Георгий Жженов, писатель Джодж Оруэлл, футболистар — Дэвид Бекхэм, Лионель Месси ва масабур.

“Лезги газетдин” редакциядин коллективди вири ватанэгьлийриз алукьзавай йис мубаракзава. Къуй ам ислягьди, чи уьлкведиз, халкьдиз гъалибвал гъидайди, гьар са хизан, инсан патал  сагъламди, берекатлуди, бахтаварди, шадди, зегьметда агалкьунар къазанмишдайди хьурай!

Нариман Ибрагьимов