И йикъара СтIал Сулейманан райондин Кьулан СтIалдал Россиядин Игит Хиликьован тIварунихъ галай юкьван мектебда ММА-дай республикадин дережадин турнир тухвана. Аниз Дербентдай, Хасавюртдай, Мегьарамдхуьряй, Хивдай ва масанрай 15 командадик кваз 100-дав агакьна спортсменар атанвай. КIватI хьанвайбурун вилик райондин администрациядин кьил С.Темирханов, образованидин управленидин начальник Гь.Шихбабаев ва спорткомитетдин регьбер Ч.Абдулмежидов чими келимаяр рахана, эхиримжи вахтара йигин еришралди вилик физвай жуьре тир ММА-дай агалкьунар хьана кIанзавайди лагьана.
Спортсменри цIиргъина аваз зал тирвал гьуьрметдин чарх яна, чпин чкаяр кьуна. Ахпа сад-садан гуьгъуьналлаз экъечIиз, гьар са спортсменди вичин алакьунар къалурна.
Зирингвал, вири къуватар эцигна, ийизвай чалишмишвилер фикирда кьуналди, заз Курхуьруьн 2-нумрадин юкьван мектебдин 10-классда кIелзавай Ибрагьимов Межведилан устадвал къейд ийиз кIанзава. Вичин хьиз, 58 кг-дин заланвал авай 3 спортсмендихъ галаз ада бягьс чIугуна, пуд сефердани гъалибвал къазанмишна. 1-чка кьур амай спортсменриз хьиз, адазни махсус чIул, диплом ва медаль гана. Межведила тренер Абдурагьманов Камилан гъилик вердишвилер къачузва. Исятда ам чIехи акъажунриз гьазур жезва. Къуй агалкьунар хьурай!
Райсудин Набиев
