Алатай гьафтеда Махачкъалада, “Дагправда” газетдин редакцияда, Дагъустандин физический культурадин ва спортдин рекьяй министр Сажид Сажидова журналистрихъ галаз пресс-конференция кьиле тухвана. Алатзавай йисан нетижаяр кьадайла, министрди карантин, сергьятламишунар, санкцияр себеб яз, бязи акъажунра чи спортсменривай иштиракиз хьаначтIани, уьлкведин, гьакIни международный кесерлу са жерге майданра хъсан нетижаяр къазанмишиз алакьайди къейдна. Кьилди къачуртIа, 2022-йисуз чи спортсменрилай 2000-дав агакьна медалар (абурукай 600 — къизилдинбур) къазанмишиз алакьайди раижна. Министрди дагъустанвийри, UFC -дин чемпионвилин тIварар къазанмишуналди, дуьньядин спортдин алемда чпикай хабар гайи дуьшуьшарни рикIел хкана, алукьзавай йисуз вилик мадни чIехи месэлаяр квайди къейдна… Кьилиндини, республикадин агьалийрин чIехи пай (са миллионни 550 агъзурдалай виниз, 54,1%) физический культурадал ва спортдал ара датIана машгъул жезва. Абур 3 йисалай 80-дав агакьдалди яшара авайбур я.
Сажид Сажидов санлай республикада спортдин рекьяй кьиле тухузвай кIвалахдал гегьеншдаказ акъвазна. Региондин Кьил С.Меликован гуьзчивилик кваз спортшколайрин материально-технический база хъсанаруниз артух фикир гузва. “Спорт — уьмуьрдин норма” федеральный проектдин сергьятра аваз Дагъустанда спортдин 32 имарат эцигна ва ишлемишиз вахкана. Алай вахтунда Дербентда, Терекли-Мектебда (Ногъай район), Эндирейда (Хасавюрт район) еке заларни галаз физкультурадинни сагъламвал мягькемардай комплексар эцигна акьалтIарзава.
С.Сажидов меркезда Елена Исинбаевадин тIварунихъ галай стадиондал кьиле тухузвай цIийикIа туькIуьр хъувунин кIвалахрикайни рахана. Малум хьайивал, Махачкъаладин футболдин “Динамо” клубди (хъуьтIуьз ял ягъайдалай кьулухъ) кIвалин къугъунар ина кьиле тухудайвал я. ИкI, ина газон чими ийидайвал туькIуьрнава, трибунадин кIаник квай чкайра ремонтар кьиле тухузва.
Журналистри министрдивай Каспийскда кардик квай “Труд” стадиондин, Махачкъалада жуьмя мискIиндин патав эцигзавай спортдин имаратдин кьадар-кьисметдикайни хабарар кьуна. Сажид Сажидован гафаралди, “Труд” стадион Каспийскдин агьалийривай ял ягъиз жедай къулай чкадиз элкъуьрун патал алай вахтунда цIийикIа туькIуьр хъувунин кIвалахар гъиле кьунва. Меркездин “долгостройдиз” талукь яз хъсан хабарар тIимил аватIани, 2023-2027-йисара хейлин кIвалахар тамамарда.
Сажид Сажидова министерстводи, акьалтзавай несилдиз руьгьдинни ахлакьдин тербия гунал гьалтайла, еке кIвалах тухузвайди ва и кар инлай кьулухъни давамардайди къейдна. Наркомания, терроризм ва экстремизм хьтин чIуру завалрикай хуьн патал, машгьур спортсменарни желб авуналди, министерстводин къуллугъчияр Дагъустандин вири спортшколайриз, лагерриз, гьакIни чи чемпионар Дагъустандин диаспораяр яшамиш жезвай Россиядин гьар са пипIез мугьман хьайиди раижна.
Рагнеда Рамалданова
