2022-йисан нетижайралди, Дагъустанда жуьреба-жуьре майваяр цазвай майданрин кьадар 37 процентдин гзаф хьанва ва анрай 1,5 миллион тонндив агакьна бегьер кIватI хъувунва. Идакай ТАСС-диз РД-дин хуьруьн майишатдин ва суьрсетдин министр Мухтарбий Аджекова хабар гана.

Министрдин гафаралди, республикадин хуьруьн майишатда майвачивилин хел кар алайбурукай сад я. Урусатдин хуьруьн майишатдин министерстводи Дагъустандин вилик регионда майвайрин производстводин кьадар артухарунин месэла эцигнава. Ам гьялунин сергьятра аваз майваяр цазвай майданар 1,8 агъзур гектардин артухар хъувунва. Алай вахтунда майвайрин майданри 41 агъзур гектар тешкилзава.

М.Аджекован фикирдалди, федеральный “Развитие отраслей овощеводства и картофелеводства” проект кардик акатуни Дагъустанда майвачивилин хел мадни вилик финиз таъсирда.

Къведай йисуз РД-дин хуьруьн майишатдин ва суьрсетдин министерстводиз республикада майваяр цазвай майданрин кьадар 42 агъзур гектардив агакьариз кIанзава.

«Лезги газет»