Украинада кьиле физвай махсус серенжемда

телеф хьайи кьегьал хва Рамиз Рашидован тIвар эбеди авуна

Мегьарамдхуьруьн райондин Тагьирхуьруьн-Къазмайрал и йикъара лишанлу вакъиа хьана. Ам жемятди, иллаки же­гьил­ри, гатфарилай инихъ вилив хуьзвайди тир. Ина республикада кIвен­кIвечи­бу­рукай сад тир, тIвар-ван авай спортсменар тербияламишзавай Олимпиададин резервдин “Самур” тIвар алай  спортшколадиз Рамиз Рашидован тIвар гуниз талу­кьарнавай митинг кьиле фена.

Рамиз Рашидован игитвиликай, Ватандиз къуллугъунин рекье къурбанд авур адан экуь мурадрив ацIанвай куьруь уьмуьрдикай, диде-бубадикай “Лезги газетдиз” гегьенш макъала акъатнай. РикIел хкин: Росгвардиядин спецназда къуллугъ ийиз гуьгьуьллудаказ фейи спортсмен Рамиз Рашидова Россияди Украинада тухузвай махсус серенжемда сифте йикъалай иштиракна. Кьвед ла­гьай юкъуз, 25-февралдиз, ам игитвилелди телеф хьана.

Женг бейхабардиз башламиш хьанай. Чи разведчикрин десте, вири гьазурвилер акуна, далдаламиш хьанвай душманрин еке геллегьдал расалмиш хьана. Сифте декьикьада командирдикай магьрум хьайи дестедиз регьбервал гун, женг тешкилун младший сержант Рамиз Рашидова вичин хивез къачуна. Адан дуьз гьерекатри, буйругъри гзафбур телеф хьуникай къутармишна. Юлдашар къутармишун патал Рашидоваз вичин чанни гьайиф атанач.

Россиядин Президентдин Указдалди, Рамиз Абдулнасирович Рашидоваз “Жуьр­этлувилин” орден (кьейидалай кьу­лухъ) гана.

Гила Дагъустан Республикадин Кьил Сергей Меликован Указдалди Тагьирхуьруьн-Къазмайрал алай Олимпиададин резервдин “Самур” спортшкола Р.А.Рашидован тIварунихъ янава.

Вичи вердишвилер къачур школадин цлал игит рикIел хуьнин мармардин кьул алкIуруниз талукьарнавай митингда райондин администрациядин кьилин сад лагьай заместитель Фейрудин Рагьимхано­ва, заместитель Марта Абдуллаевади, РД-дин спортдин ва физический культурадин министерстводин управленидин начальник Алибег Махачева, военный ко­миссар, запасда авай подполковник Эльман Гьажиева, Р.Рашидова къуллугъ авур отряддин векил, майор Евгений Ставяненкоди, райондин культурадин управленидин начальник Эседуллагь Селимова, хуьруьн администрациядин кьил Марат Эмирова, спортшколадин директор Мумин Гьабибова, ветеранри, гзаф кьадар хуьруьнвийри, паталай атанвай мугьманри ва школьникри иштиракна.

— Рамиз Рашидова лап четин, инсандин жуьрэтлувал ахтармишдай макъамда, са легьзедани шаклу тахьана, вичин кьисмет хкяна: кьиникьикай  кичIе тахьана, женгинин юлдашар къутармишна, ватанпересвилин чешне, гражданвилин виниз тир ерияр къалурна, — къейдна мярекатдал ра­хайбуру. Кьегьал хва тербияламишунай абуру Рамизан диде-бубадиз — Абдулнасир Агъамовичаз ва Марита Агъарагьимовнадиз сагърай лагьана, абуруз ва вири мукьва-кьилийриз мад сеферда башсагълугъвал гана. Ф.Рагьимханова вичин рахунра Мегьарамдхуьруьн райондин администрация Рашидоврин хизандиз куьмекар гуз гьамиша гьазур тирди малумарна.

Чи мухбир