Апрелдин эвелра чи газетда Къурукаларин хуьруьн мукьув гвай къаналдин кьилин габиондин цал вацIу тухванвайдакай, ам вахтунда ремонт тахвуртIа, Гуьней патан агьалияр дигидай цикай магьрум жедайдакай кхьенвай.
ЧIуру гьалар арадай ахкъудун патал “Сельсовет Ахтынский” СП-дин кьил Низами Эфендиева, райондин МЧС-дин начальник Сердер Моллалиева, УОС-дин начальник Мажидин Мамедбегова, инженер Равил Гьамзаева габиондин чкадал плитайрин цал эхцигуналди (шикилда), и чка мягькемар хъувуна. Абурун гуьзчивилик кваз УОС-дин бульдозерист Гьабиб Эскендерова кIвалахра чешнелудаказ иштиракна. Абурал и идарадин ковш галай трактор, бульдозер, гьакI кьве кранни желбнавай.
Гуьней патан агьалийри и кIвалахра иштирак авур вирибуруз рикIин сидкъидай чухсагъул лагьана. Алай вахтунда къаналда датIана яд хьунал гуьзчивалзава.
Рагьидин Эминов
