Кьасумхуьрел Сулейман-Стальский райондин администрациядин активдин совещание кьиле фена. Ана “Сулейман-Стальский район” МР-дин кьил Нариман Абдулмуталибова, райондин собранидин председатель Штибег Мегьамедханова, райадминистрациядин кьилин заместителри, хейлин идарайрин руководителри, хуьрерин администрацийрин кьилери ва общественностдин векилри иштиракна.
Мярекатдал терроризмдиз акси яз муниципальный райондин комиссиядин къарарар ва терроризмдин идеологиядиз аксивал авунин комплексдин пландин серенжемар райондин са бязи хуьрерин администрацийри уьмуьрдиз кечирмишзавай гьалдиз килигна.
И месэладин гьакъиндай общественный хатасузвилин рекьяй райондин администрациядин кьилин заместитель Абуталиб Фатулаева, Цмуррин, КIварчагърин, Алкьвадрин, Эминхуьруьн администрацийрин кьилери Раида Алибеговади, Жалил Къурбанмегьамедова, Алим Гьуьсейнова ва Бейдуллагь Къарибова малуматар гана. Абуру къейд авурвал, чкайрал гзаф кьадар агьалияр кIватI жезвай вахтунда общественный хатасузвал хуьн патал герек серенжемар кьабулзава. Талукь органри гуьзчивилик кутунвай инсанрихъ галаз кьилди-кьилди таблигъатдин кIвалах тухузва. Акьалтзавай несилдиз терроризмдин, экстремизмдин гьакъиндай герек малуматар гузва.
Малум хьайивал, хуьрера терроризмдиз акси комиссияди кьабулнавай къарарар уьмуьрдиз кечирмишун патал тухузвай метлеблу кIвалах акъвазарнавач. Винидихъ тIварар кьунвай хуьрерин мулкарал терроризмдин хаталу гьерекатар авач. Хуьрерин администрацийри къайдаяр хуьдай органрихъ галаз санал кIвалахзава. Терроризмдин ва гьакI маса тахсиркарвилерин вилик пад кьун патал агьалийрихъ галаз, кIвалериз физ, гъавурдик кутунин кIвалах тухузва, гуьгьуьллубурун дестейри общественный чкайра дежурство ийизва. Хуьрерин школайра аялар диндин месэлайрин гъавурда твадай лекцияр тешкилзава. Абурун вилик къайдаяр хуьдай органрин ва диндин векилар экъечIна рахазва.
Рахай юлдашрин ихтилатриз къимет гуналди, Нариман Абдулмуталибова къейд авуна хьи, общественный хатасузвал ва яшайишдин, культурадин кар алай объектар хуьнин месэладал гьалтайла, администрацийри чпин вилик эцигнавай везифаяр гьар юкъуз кьилиз акъудун алай йикъан истемишун я. Санлай къачурла, хуьрера оперативный гьалар разивалдайбур ятIани, терроризмдин ва экстремизмдин идеологиядиз аксивал авунин кIвалах акъвазарун лазим туш. Школьникриз гатун каникулар хьанвай вахтунда ял ядай ва машгъул жедай серенжемар тешкилун герек я.
Совещанидал гьакI райондин администрациядин кьилин заместитель Саид Темирханова ЖКХ-дин гуьзчивилик кваз эцигзавай капитальный эцигунрин гьакъиндай авай гьалдикай ва чкадин самоуправленидин органри гузвай малуматрикай вичин фикир лагьана.
Чи мухбир
