Алай йисуз Дагъустанда карчивилиз куьмек гун патал чара авунвай финансрин такьатар тамамдаказ ишлемишнава. Ихьтин малумат 16-декабрдиз республикадин журналистрихъ галаз гуьруьш хьайи вахтунда РД-дин карчивилин ва инвестицийрин рекьяй Агентстводин руководителдин советник Шагьимардан Салигьова гана. Мярекат идаради цIи кьиле тухвай ва алукьзавай 2023-йисуз вилик эцигнавай месэлайриз талукьди тир.
РикIел хкин, 2022-йисуз Дагъустанда карчивилин кIвалах таъминарун патал бюджетда 360 миллион манат фикирда кьунвай. Салигьован гафаралди , и такьатар тамамдаказ ишлемишнава. 2023-йис патал, ада хабар гайивал, бюджетдай 470 миллион манат чара ийидайвал я.
Государстводин куьмекдикай менфят къачуз хьанвай гъвечIи ва юкьван карчивилин субъектрикай рахадайла, Ш.Салигьова, чешне яз, микрозаймар къачур ва абурун куьмекдалди алава тадаракар маса къачуз хьайи са жерге карханайрин тIварар кьуна.
Эхиримжи йисара асул фикир гузвайбурук “Дагъустан Республикадин мулкунал гуьнгуьна хутаз жедай энергетикадин хилен инвестицийрин проектар уьмуьрдиз кечирмишунин гьакъиндай” месэла акатзава. Гуьнгуьна хутаз, арадал хкиз жедай чешмейрин бинедаллаз энергетикадин къурулуш вилик тухун, гьакI 2030-йисалди Кеферпатан Кавказдин федеральный округ яшайишдинни экономикадин рекьяй виликди тухунин Стратегиядин хилерикай сад я.
“И месэла гьялун патал чахъ республикада гуьнгуьна хутаз жедай энергиядин тIебии ресурсар гзаф ава. Кьилди къачуртIа — гарарин, ракъинин, цин мумкинвилер. Ида лагьайтIа, гуьнгуьна хутаз жедай жуьредин энергетикадин хилез инвестицияр желбдай мумкинвални гуда”, — гьисабзава ада.
Салигьован гафаралди, республикадин инвестицийрин проектрин сиягьдик гуьнгуьна хутаз жедай энергетикадин 7 проект кутунва. Абурун санлай къачур къимет 16 миллиард манатдиз барабар я. И проектар уьмуьрдиз кечирмишунин нетижада кIвалахдин цIийи 973 чка арадал гъиз жеда.
«Лезги газет»
