Мегьарамдхуьруьн районда, Россиядин Президент В.Путинан тапшуругъдин сергьятра аваз, тIебии газ агакьарнавай мулкара газдин линийрихъ галкIур тавуна амай кIвалер пулсуздаказ газдик кутунин кIвалахар активнидаказ кьиле тухузва. И кIвалах Дагъустан Республикадин гьукуматди “Газпром” компаниядихъ ва муниципальный образованийрин администрацийрихъ галаз санал кьиле тухузва.
Къенин йикъалди Мегьарамдхуьруьн райондин агьалийрин патай пулсуздаказ газдик кутунин программадик экечIуниз талукь 160 арза атанва. Абурукай 110 арзадиз разивал ганва ва кIвалахдин план-графикдик кутунва.
Агьалийрин кIвалер пулсуздаказ газдик кутунин программада иштиракун патал арзаяр райондин газдин къурулушдиз къуллугъзавай идарада ва райондин администрацияда кьабулзава. Арза вугудайла, абонентди вичин кIвал газдин линийрихъ галкIурун патал талукь вири документар агакьарун лазим я.
РикIел хкин, лазим тир документрик акатзва: паспортдин делилар, капитальный эцигунрин объектдин ва ам алай чилин иеси тирди тестикьарзавай документ, СНИЛС, ИНН, са сятда харжзавай газдин кьадар (эгер ам 7 кубометрдилай гзаф хьун мумкин ятIа), алакъа хуьдай телефондин нумра.
Алай вахтунда Мегьарамдхуьруьн районда тамамдаказ ва пулсуздаказ газдик кутунин программадин сергьятра аваз Мегьарамдхуьряй, Къуюстандилай, Ярагъ-Къазмайрилай, Филяй, Уружбадилай, Самурдай ва ЦIийихуьряй 12 кIвал газдин линийрихъ галкIурнава. Мад вад хуьруьн мулкарал алай 20 объектдал газдин турбаяр тухунин кIвалахар кьиле тухузва.
Къейд ийин, Президентдин тапшуругъдалди уьмуьрдиз кечирмишзавай программадин сергьятра аваз Мегьарамдхуьруьн райондин газдин линийрик сад лагьай кIвал алай йисан августдиз кутунай.
Чи мухбир
