Ахцегьрин баркаван чили Ватандиз гзаф кьадар машгьур инсанар ганва. Лезгийрин машгьур художник, скульптор, Россиядин художествойрин академиядин член-корреспондент, Россиядин образованидин академиядин (Санкт-Петербург шегьер) Смольный институтдин искусствойрин кафедрадин профессор Шариф Шагьмарданович Шагьмарданов абурукай сад я. Зегьметда къазанмишнавай виниз тир агалкьунрай ам “Дагъустан АССР-дин искусствойрин лайихлу деятель” (1985), “Россиядин Федерациядин лайихлу художник” (2011), “Дагъустан Республикадин халкьдин художник” (2017) лагьай гьуьрметдин тIварариз лайихлу хьанва.
Ингье гила ада нубатдин агалкьун къазанмишнава. Ш.Шагьмарданов Россиядин художествойрин академиядин президент З.К.Церетелидин, гьакI художествойрин академиядин членрин къулар алай Гьуьрметдин грамотадиз лайихлу хьанва. И шабагьдиз ам Россиядин культурадин ва искусстводин абадвал патал бегьерлувилелди зегьмет чIугунай ва РФ-дин художествойрин академиядин вилик кьетIен агалкьунрай лайихлу хьана.
Чи машгьур ватанэгьлидиз нубатдин агалкьун чна рикIин сидкьидай мубаракзава ва адахъ мадни еке агалкьунар хьун алхишзава.
Къейд ийин хьи, Шариф Шагьмардановахъ галаз чи газетдин хсуси мухбир Дашдемир Шерифалиева кьиле тухвай интервью алай йисан 7-июлдиз акъатай 27-нумрада чапнава.
Нариман Мамедов
