КцIара Дагъустандин эдебиятдин классик

Кьуьчхуьр Саидан 255 йисан юбилей къейдна

18-декабрдиз КцIарин ктабханада лезги эдебиятдин межлис кьиле фена: Етим Эминан, Байрам Салимован, Расим Гьажидин, Фейруз Беделован, Лезги Няметан, Асеф Мегьманан ирсиниз талукьарнавай мярекатар кьиле тухвай “Алам” журналдинни эдебиятдин “Марвар” кIва­тIалдин векилри лезгийрин машгьур шаир, Дагъустандин эдебиятдин классик Кьуьчхуьр Саидан 255 йис тамам хьуниз талукьарнавай сувар тешкилнавай.

Мярекатда са кьадар шаирри­, журналистри, муаллимри, мектебра кIелзавай аялри, милли ши­иратдал рикI алай ксари, мани­дар­ри иштиракна. “Алам” журналдин кьилин редактор Къурбаналийрин Камрана кьиле тухвай мя­рекат, мукьвара рагьметдиз фе­йи лезги шаиррин — Азиз Алеман, Шихжамал Шихметован, Зе­рифа Кьасумовадин экуь къаматар рикIел хкунин лишан яз, са де­кьи­кьада кисна акъвазунилай гатIун­на.

Кьуьчхуьр Саидан уьмуьрдикай, эсеррикай, адан девирдикай и цIарарин автор Гуьлалийрин Эйваз, шаир Вакъиф Муьшкуьрви, муаллим Зиятхан Мурадханов, Оруж Оружев, этнограф Абир ЭчIехви, жегьил шаирар — Эн­жам Веледов, Элмар Иманкъулиев, Жавид Тагьиров ва ма­са­бур рахана. Мярекатдал шаир, композитор Мурад Саида гьазурнавай, Кьуьчхуьр Саидан Да­гъустанда акъатнавай “Руьгьдин вилер амазма захъ” тIвар алай ктабни кIелдайбурув агакьарна.

ТIвар-ван авай чIагъанчи Расим Бакаров кьиле аваз атанвай кцIарви манидарри — Ливана Ибрагьимовади, Бегьруз Гьажибегова Кьуьчхуьр Саидан гафариз кхьенвай манияр тамамарна, Лезги Няметан руш Рига Нямета, Манкъулидхуьруьн мектебда кIелзавай Амина Абасовади, Армида Оружевади шаирдин шиирар кIелна.

Шад гьалара кьиле фейи мярекатда интернетдин куьмекдалди Дагъустандай шаирдин ирс кIватIунал машгъул тир Мурад Саида, шаир Фазил Аслано­ва, Кьуьчхуьррин хуьруьн администрациядин кьил Аскер Жабраиловани иштиракна.

Эйваз Гуьлалийрин, шаир, муаллим