Эхиримжи вахтара, виликдай хьиз, чи уьмуьрда гевилар хкаждай мярекатар са акьван пара амач. Жуьреба-жуьре вакъиаяр себеб яз, инсанрин рикIера секинвал авач: вилерал нагъв, ясдин парталар алай дишегьлиярни йикъалай-къуз пара жезва. И кардин себебни виридаз ашкара я. Амма мукьвара Мегьарамдхуьруьн районда руьгь кутадай, гуьгьуьлар хкаждай хъсан межлис кьиле фена: Уружбайрин хуьруьн мектебда Дагъустандин халкьдин писатель Абдуселим Исмаилован 75 йисан юбилей къейдна.
Уружбайрин хуьре эцигнавай мектеб акур касдивай кисна акъвазиз жеч. Ана кIвалахзавайбур ва кIелзавайбур бахтаварар я, вучиз лагьайтIа и дараматда вири шартIар тешкилнава.
И йикъара зи гъиле 2017-йисуз акъатнавай “Самур” журналдин 5-нумра гьатна. Ана Дагъустандин халкьдин писатель А.Исмаилован 70 йисан юбилейдихъ галаз алакъалу яз, адаз талукь гзаф макъалаяр чапнава. Кьилди къачуртIа, писателдин “Уьмуьрдин ктабдай” са бязи чинар ганва ва эхирдай икI кхьенва:
“Гьелелиг, жуваз адет хьайивал, намуслувилелди фу нез, яд хъваз, инсанвилин ва инсанрин къадир чиз ва хуьз, уьмуьр давамарзава. Уьмуьр куьтягь хьайитIани, тIвар куьтягь жедач хьи…”.
Гьахъ я. Абдуселим Исмаилов хьтин писатель, тупIалда авай къаш хьиз, рапрапар, чи эдебиятда экуь нур гуз жеда. Адан эсерриз, яратмишунриз халкьди еке къимет гузва. Чи халкьдихъ ахьтин шаир, гьикаятчи хьунал дамах ийиз жеда. Къуй адан къелем мадни хци ва кIелзавайбур цIийи эсерралди шад ийидайди хьурай! Чи мурад сад я: Абдуселим Исмаиловахъ кIубан сагъламвал, яргъи уьмуьр, руьгьдин илгьам хьун.
Саида Эфендиева, методист
