И йикъара Украинада кьиле физвай махсус военный серенжемда телеф хьайи Дербент шегьердин 8-нумрадин школада кIелай Алимамед Марданован, 12-нумрадин школада кIелай Руслан Мегьамедован, 18- нумрадин школада кIелай Салман Сулейманован, Багьман Вердиханован, Нияз Меликован, 19-нумрадин школада кIелай Къагьир Керимован ва 21-нумрадин юкьван школадин виликан ученикрин — Бахтияр Багдаеван, Ильяс Ражабован, Мухтар Къазимегьамедован тIварар эбеди авуниз талукьарна, мемориалдин кьулар ачухзавай мярекатар кьиле фена.
Гьар са школада кьилди кьиле фейи ватанпересвилин мярекатра шегьердин кьил Рустамбег Пирмегьамедова, адан заместитель Видади Зейналова, шегьердин депутатрин собранидин председатель Гьасан Мирзоева, ветеранрин советдин председатель Гьажимурад Гьажимурадова, военный комиссардин заместитель Ахрасиб Алиева, школайрин муаллимри, аялри, телеф хьанвай игитрин багърийри, мукьва-кьилийри иштиракна.
Мярекатрал рахай Рустамбег Пирмегьамедова кьегьалри махсус военный серенжемда къалурай викIегьвал, дирибашвал къейдна.
“Салман Сулеймановаз, Багьман Вердихановаз, Нияз Меликоваз телеф хьайидалай кьулухъ “Жуьрэтлувилин” орденар ганва, — лагьана ада. — Къе кьиле физвай мярекатди, игитрин тIварар эбеди авуни акьалтзавай несилрив абур рикIелай ракъуриз тадач. Чи везифа кьегьалрин диде-бубайриз гьамиша вири рекьерай куьмекар гун я”.
18-нумрадин школадин директордин заместитель Гуьлнара Бугалдиновади, Руслан Мегьамедовахъ галаз са классда кIелай Марият Гьамзаевади, Къагьир Керимован классдин руководитель Заидат Мисриевади, школа акьалтIарна са акьван вахт фенвачтIани, абур школайрин дегьлизрай гьикI катзавайтIа, рикIел аламайди, абурун хъуьтуьл къилихрикай ва къастунин кIевивиликай бязи агьвалатар рикIел хкана.
КIватI хьанвайбуруз игитрин багърийри ва мукьва-кьилийри сагърай лагьана.
Мярекатар мемориалдин кьуларал цуькверин кIунчар эцигуналди ва са декьикьада кисна акъвазуналди акьалтIна.
Къагьриман Ибрагьимов
