Дербентда РСФСР-дин лайилу артист, машгьур актер, режиссёр Багъиш Айдаеван 90 йисан юбилей къейдна
“Ада Лезги театрдин тарихда халис игитвал къалурна. Ам чи милли театрдин алемда кьилин образование къачунвай сад лагьай пешекар режиссер тир. Адан яратмишунрин бинеда девлетлу, савадлу руьгь, акьулдин меденият, чIехи бажарагъ ва къени, экуь ниятар авай”, — рикIел хкизва РСФСР-дин лайихлу, Дагъустандин халкьдин артист, алакьунар авай актер, надир режиссер Багъиш Мустафаевич Айдаевахъ галаз санал кIвалахун кьисмет хьайи милли театрдин ветеранри.
14-декабрдиз Дербент шегьерда, Лезги театрда, Б.Айдаеван 90 йис тамам хьуниз талукьарнавай чIехи межлис кьиле фена. Ана театрдин коллективди, рагьметлу артистдин мукьвабуру, медениятдин, образованидин, жемиятдин тешкилатрин векилри, республикадин искусстводин машгьур деятелри, шаирри, студентри ва милли театрдал рикI алай хейлин ватанэгьлийри иштиракна. Дагъустандин тIвар вири уьлкведиз машгьур авур устаддин экуь къаматдиз талукьарнавай межлисдин сегьнедиз экъечIайбурун арада вучиз ятIани республикадин медениятдин министерстводин, Дербент шегьердин, Багъиш Айдаеван хайи Докъузпара райондин администрацийрин векилар авачир. Багъиш Мустафаевич хьтин кьегьалрин ирс хуьн, адав къайгъударвилелди эгечIун, адаз гьуьрметун чи виридан умуми буржи тирди рикIелай алудна виже къведач.
Мярекатдин асул пай Лезги театрдин директор Динара Эминовадини кьилин режиссер Казбек Думаева ачухна. Чпин рахунра абуру Багъиш Айдаеван яратмишунрин рекьин гегьеншвал, генгвал, актердиз хас кьетIен алакьунар къейдна.
РФ-дин лайихлу артист, къумукьрин театрдин актер Байсолтан Осаева вичин рахунра Багъиш Айдаева Дагъустандин ва вири Урусатдин медениятдин алемда тунвай гел рикIел хкана. «Багъиш Айдаев театрдин сегьнеда къатидаказ нур гайи, амма фад туьхвей гъед хьиз я. Ада куьруь, амма гзаф девлетлу, итижлу уьмуьр кьиле тухвана. 47 йисан уьмуьрда устадди неинки са хайи республикадин, гьакIни чIехи уьлкведин сегьнеярни кваз муьтIуьгъарна. Адан экуь къамат чи рикIера эбеди я», — лагьана Б.Осаева.
Вичин нубатда Имам Яралиева Багъиш Айдаев хьтин пешекаррин ирсинихъ къенин юкъуз акьалтзавай несилар патал авай важиблувал къейдна. Ада гьакIни хейлин йисара милли медениятдин хиле бегьерлудаказ зегьмет чIугур, халкьдин тарихда лайихлу чка кьунвай векилрин тIварарив, ирсинив къадирлувилелди эгечIунай, чешнелудаказ абурун крар давамарунай Лезги театрдин коллективдиз сагърай лагьана. И.Яралиева мярекатдин иштиракчийризни хайи чIалав, тарихдив, медениятдив, адетрив къайгъударвилелди эгечIуниз эвер гана ва вичин рахунар лезгийрин машгьур шаир Фейзудин Нагъиеван шиирдай са бенд кIелуналди акьалтIарна.
Багъиш Айдаеван 90 йисан юбилейдиз талукьарнавай мярекат милли медениятдин сувариз элкъвена. Межлис кьиле тухузвай театрдин актерар тир Гьемзебег Эмиралиевани Гуьзел Къадировади чпин хивез къачунвай везифа тарифдай къайдада кьилиз акъудна.
Мярекатдин сергьятра аваз Лезги театрдин актерри чи халкьдин рикI алай манияр тамамарна, Багъиш Айдаева эцигай “Ашукь Саид”, “Ашукь Къариб”, “Фундугъбег” ва маса тамашайрай, гьакI “Тучи покидают небо” кинофильмдай (ана Баширан ролда Б.Айдаев къугъванай) чIукар къалурна.
Эхирдай сегьнедиз Багъиш Мустафаевичан хва Рамидин Айдаев экъечIна. Ада вичин бубадин экуь къаматдиз талукьарнавай мярекат тешкилунай Лезги театрдин коллективдиз ва аниз атай вири иштиракчийриз сагърай лагьана.
Къейд ийин хьи, Багъиш Айдаеван экуь къамат эбеди авунин мураддалди Дербент шегьердин цIийи са микрорайондин куьче адан тIварунихъ янава.
Чи мухбир
