Мегьарамдхуьруьн районда Ярагъ Мегьамед дидедиз

хьайидалай инихъ 250 йис тамам хьун къейдна

Алатай гьафтедин арбе юкъуз Мегьарамдхуьруьн райондин уьмуьрда лишанлу ва­къиа кьиле фена: дагъвийрин руьгьдин буба, Кавказдин машгьур шейх  Ярагъ  Мегьамедан  250 йис тамам хьуниз талукьарнавай конференцияди гьукумдин, илимдин, жемиятдин тешкилатрин векилар, динэгьлияр, жуьреба-жуьре районрайни шегьеррай тир мугьманар санал кIватIна.

Мярекат ачухдайла, муниципалитетдин кьил Фарид Агьмедова, иштиракчияр тебрик авуналди, чIехи шейхдин экуь къаматдиз бахшнавай конференцияр районда вилик йисарани кьиле фейиди рикIел хкана. Адан фикирдалди, Дагъус­тандинни Чечнядин имамрин муаллимдин ирсиниз талукьарна тешкилзавай межлисрихъ руьгьдинни ахлакьдин жигьетдай еке метлеб ава.

“Ярагъ Мегьамедан ирсинин къиметлувал адакай ибарат я хьи, ада инсанриз руьгьдинни ахлакьдин ивирар хуьниз, вилик тухуниз эвер гузвай. Арифдардин тарсар жемиятдин гегьенш къатарив агакьарун чи умуми везифа я. И кардилай акьалтзавай несилар хайи чилин, Ватандин къадир авайбур, гъвечIи-чIехи чидайбур яз тербияламишун аслу я”, — лагьана Ф.Агьмедова.

Вичин рахунра ада гьакIни ихьтин мярекатар тешкилунин карда датIана куьмекар гунай Дагъустандин муфтий, шейх Агьмад Афандидиз ва конференциядин иштиракчийриз шейхдин экуьнал кIватI хьунай сагърай лагьана.

Гуьгъуьнлай республикадин муфтийдин тIварунихъай конференциядин тешкилатчиярни мугьманар Агьмад Мегьамедова тебрикна. Муфтийдин заместителди ихьтин мярекатар кьиле тухудай мумкинвилер хьунай Аллагьдиз шукур авуна. “Инсанар патал еке хийир авай вакъиа я. Чун санал кIватI хьуни чи арада авай дуствал мадни мягькемаруниз таъсирзава, цIийи чирвилер къачудай, тежриба хкаждай мумкинвал жезва. И кардикай, са шакни алачиз, гьам кьилди гьар са кас, гьамни вири жемият патал менфят ава. Диндин рекье чна Да­гъус­тандин халкьарин дамах тир Ярагъ Мегьамед хьтин диндар, кьегьал векилрилай­ чешне къачуна кIанда”, — къейдна ада.

Конференциядал мад Кьиб­лепатан Да­гъустанда РД-дин муфтийдин векил Гьуьсейн Гьажиев, СтIал Сулейманан рай­­ондин имамрин советдин председатель Шамил Омаров, Ярагъ Ме­гьа­ме­дан­ тIва­рунихъ галай медресадин директор, Шариатдин илимрин доктор Мугьаммад-Ариф Рамазанов, Йемендай тир алим, гьафиз Ибрагьим Агьмад аз-Зубаджи, жур­налист, политолог Ханжан Къурбанов, Ставрополь шегьердин думадин депутат Казбек Агъа­ларов, Мегьарамдхуьруьн рай­ондин имамрин советдин председатель Алихан Сефиханов ва масабур раха­на. Абуру Ярагъ Мегьа­медан ирсиникай, ада дагъвийрин уьмуьрда кьунвай чкади­кай, адан уьмуьр­дин рекьихъ акьалтзавай несилдин векилар тербияламишунин карда авай важиблувиликай чпин фикирар лагьана.

Къейд ийин хьи, мярекатдин сергьят­ра аваз Мегьарамдхуьруьн райондин кьил Фарид Агьмедова са шумуд касдив­ администрациядин патай савкьатар вахкана. Мисал яз, Разивилин чарариз ла­йих­лу хьайибурун арада Мугьаммад-Ариф Рамазанов, Алихан Сефиханов, жегьил алимрин арада кьиле фейи Вири­рос­сиядин конкурсдин гъалибчи, шейхдин неве Саидмугьаммад Гьамидов авай.

Агьмед Магьмудов