Кьуд агъзурдав агакьна
СКФО-да энергия чуьнуьхнавай дуьшуьшар виридалайни гзаф Дагъустанда винел акъуднава
“Россети Северный Кавказ” ПАО-дин энергетикри алай йисуз Кеферпатан Кавказдин Федеральный Округдик акатзавай регионра къанунсуздаказ энергиядикай менфят къачур 4 агъзур дуьшуьш винел акъуднава. Виридалайни гзаф энергия чуьнуьхнавай дуьшуьшар Дагъустандал ацалтнава.Компаниядин пешекаррин гафаралди, къанунсуз гьерекатрин нетижада 535,5 миллион манатдив агакьна зарар хьанва.
4 агъзурдакай саки 2500 дуьшуьш - Дагъустанда, 647 - Чечен Республикада, 302 - Ставрополдин крайда, 260 - Ингушетияда, 200 - Кабардино-Балкарияда винел акъудна.
“Россети Северный Кавказ” ПАО-дин пресс-къуллугъди хабар гузвайвал, электроэнергия чуьнуьхзавайбур себеб яз, вахт-вахтунда ишлемишзавай токдин пул гузвай намуслу агьалийризни зарар жезва. Сетдал пар ацалтайла, энергетикадин объектрин кIвалах къайдадикай хкатзава ва нетижада сетда энергиядин гужлувал садлагьана тIимил жезва. Ихьтин гьалара яшайишда менфят къачузвай жуьреба-жуьре приборар михьиз кунин, кардикай хкатунин хаталувал ава.
Къейд ийин хьи, “Россети Северный Кавказ” ПАО-ди СКФО-дин саки 9 миллион агьалидизни яшайишдин рекьяй акьалтIай метлеб авай 5 агъзурдалай виниз объектриз къуллугъзава.
"Лезги газет"