6-8-декабрдиз Махачкъалада, ДГУ-дин спортдин дараматда, 2002-2004, 2005-2007 ва 2008-2009-йисара дидедиз хьайи жегьилрин (гадайринни рушарин) арада Дагъустандин кIвенкIвечивал патал армрестлингдай акъажунар кьиле фена.
Армрестлингдай Россиядин спортдин мастер Шагьбан Омарован призар къачун патал РД-дин физический культурадинни спортдин министерстводи ва армрестлингдин федерацияди тешкилай акъажунрин нетижада 2023-йисуз армрестлингдай кьиле фидай Россиядин чемпионатда иштиракдай къуватлу спортсменар хкяна.
Къейд ийин, акъажунра Докъузпара райондин Мискискарин хуьруьн мектебдин физкультурадин муаллим, тренер Ариф Гьафизован регьбервилик кваз спортдал машгъул жезвай жегьилрини агалкьунралди иштиракна. ИкI, Рамазан Алипанагьова 50 килограммдин заланвал авайбурун арада чапла гъиляй 2-чка, эрчIи гъиляй 3-чка кьуна. Рамазан Арасханова 60 килограммдин заланвал авайбурун арада кьве гъиляйни 3-чкаяр кьуна.
Гъалибчийрини хъсан чкаяр кьурбуру къведай йисуз Россиядин чемпионатда иштиракдайвал я. Къуй абурухъ гьанани еке агалкьунар хьурай!
Тренер Ариф Гьафизова жегьилар спортдал желбунин рекье еке зегьмет чIугвазва. Спортдин 6 жуьредай ада жегьилар жуьреба-жуьре акъажунриз гьазурзава, хсуси харжийрихъ турнирриз тухузва. Баркалла вичиз!
К.Ферзалиев
