И йикъара чун Дербентдин почтадин алакъадин 8-отделенидиз фена ва цIийи йис патал газетарни журналар кхьинин жигьетдай коллективди тухузвай кIвалахдихъ галаз таниш хьана.
Шегьерда авайбурукай 8-отделенидиз вучиз фена лагьай суал гун мумкин я газет кIелзавайбуру. И кардин себеб ам хьана хьи, мукьвара “Лезги газетдин” редакциядиз хайи чIалал акъатзавай газет фадлай кхьизвай Дербент шегьердин агьали Селимат Абдулмаликовади зенгнавай. Ада почтадин алакъадин 8-отделенидин къуллугъчийрилай, кьилди къачуртIа, кIвализ вахт-вахтунда кагъазар, газетар хкизвай почтальон Анфиса Саидовадилай вичин разивал къалурна, абурун тIварцIихъ хуш келимаяр лагьана. Ада гьакIни редакциядивай и коллективдин кIвалахдикай газетдиз макъала акъудун тIалабна.
Ада чаз хабар гайивал, “Почтадин алакъадин 8-отделение гъвечIиди ятIани, ана кIвалахзавай коллективдин зегьмет тариф авуниз лайихлу я. Инсанар рикIиз чимибур я. Зун яшамиш жезвай пата къуллугъзавай почтальон Анфиса ваха гьам газет, гьамни кагъазар, телеграммаяр — вири вахтунда зав агакьарзава. Зун адан кIвалахдилай пара рази я. Са посылка рекье тваз почтадиз фейилани, анин къуллугъчийри агьалияр чинал хъвер алаз кьабулда…”.
8-отделение Дербент шегьердин Къазимегьамед Агъасиеван тIварунихъ галай проспектда ава. Агьалияр яшамиш жезвай вад мертебадин кIвалерин сад лагьай гьавада авай и отделение кардик кваз хейлин йисар я. Эхиримжи цIуд йисан къене анин начальник яз чи ватанэгьли Латифа Фуадовна Исламовади кIвалахзава. Л.Исламова 1976-йисуз Мегьарамдхуьре дидедиз хьана. 1993-йисуз Мегьарамдхуьруьн юкьван школа акьалтIарна, Дагъустандин госуниверситетдин экономикадин факультетдик экечIна. Университет акьалтIарна, “Дагсвязьинформ” ОАО-да бухгалтервиле кIвалахна. Алай вахтунда почтадин алакъадин отделенидиз регьбервал гузва.
— Чи отделенида кIвалахзавай 10 пешекарди 20 агъзурдалай гзаф агьалийриз къуллугъзава, — ихтилатзава Латифа Фуадовнади. — Ина дуствилелди кIвалахзавай са хизан хьтин дишегьлийрин хъсан коллектив арадал атанва. Вилик йисара газетар, журналар кхьидайбурун, чарар-цIарар рекье твадайбурун кьадар гзаф тир. Гила лагьайтIа, тIимил хьанва. Дуьз лагьайтIа, кагъазар жувани лап тIимил кхьизва. Электронный почта, факсар, социальный сетар — са гафуналди, регьят рекьер пайда хьанва, — хиве кьазва Л.Исламовади.
- АкI ятIа, почта герек амукьдачни? — хабар кьуна за.
— Бязи везифаяр тIимил жеда, абурун чкадал цIийибур акъатда. КIвалах авачиз амукьдач. Алай аямдин истемишун, гуьгъуьна амукь тавуна, вахтунихъ галаз санал виликди фин я. Иниз килигна, чна гьамиша чи муьштерияр патал цIийи къуллугъар арадал гъизва. Адетдин къуллугърилай гъейри (газетар, журналар кхьин, посылкаяр, кагъазар, суддин органрин, налогрин инспекциядин, Пенсийрин фондунин тади телеграммаяр рекье тун), чна агьалийриз ЖКХ-дин чарар ракъурзава. Идалайни гъейри, почтадин алакъадин отделенийрай жуьреба-жуьре метягьар (недай-хъвадай, канцеляриядин, химиядин, парфюмериядин ва масабур) маса гудай пипIерни кардик акатнава. Пис тушир, эгер кIвалахдин рекьяй къулай шартIарни тешкилнайтIа. 2025-йисалди Дагъустанда цIийикIа туькIуьр хъийидай почтадин алакъадин 315 отделенидин сиягьдик чи отделенини акатдайдак умуд кутунва.
Гаф кватай чкадал заз чи отделенида хейлин йисара гьакъисагъвилелди зегьмет чIугвазвай къуллугъчийрин тIварарни кьаз кIанзава, — давамарзава Л.Исламовади. — Абурун арада Анфиса Саидова, Гуьлуьмагъа Халилова, Наталья Бодрова, операторар тир Замира Ражабова, Гуьлмира Рафетова, Гуьлжанат Ашурбегова ава.
- Цийи йис патал газетар, журналар кхьинин жигьетдай куьне агьалийрихъ галаз гьихьтин кIвалах тухузва?
— Чи почтальонар датIана агьалийрихъ галаз алакъада ава. КIвалериз газетар, кагъазар вахкудайла, сифте нубатда абуру агьалийрин рикIел цIийи йис патал изданияр кхьидай вахт алукьнавайди хкизва. Са кьадар вахт арадай фейила, и кардикай мад сеферда хабар хгузва. Абуруз подписка авунин рекьяйни куьмекар гузва.
Алай вахтунда газетар анжах яш хьанвай агьалийри кхьизва. Жегьилар гьикьван гъавурда туртIани, абурун виридан вилер телефонда, интернетда ава. Гъиле авай йисуз чи отделенида 45 касди “Лезги газет” кхьена, вахчузва. ЦIийи йис патални чун газетар кхьинин кьадар авайдалай артухариз алахъда. Гьелелиг 32 касди кхьенва. Заз инал гьамиша “Лезги газет” кхьизвай са жерге идарайринни инсанрин тIварарни кьаз кIанзава: “ТЕФИ” фирма (22 газет), Тельман Гьамзаев, Физули Сугъуев, Селимат Абдулмаликова, Мавлуьд Мавлуьдов, Мегьамед Мирзоев, Арсен Рамазанов ва масабур.
- Къуй хайи чIаларал акъатзавай изданияр кхьидайбурун кьадар гзаф, квехъни кIвалахда агалкьунар хьурай!
— Сагърай!
Къагьриман Ибрагьимов
