СтIал Сулейманан райондин кьил Саид Темирханован регьбервилик кваз кьиле фейи администрациядин аппаратдин совещанидал райондин здравоохраненидин хел меди­цинадин пешекарралди бес кьадарда  таъ­мин­ хьунин месэладиз килигна. И кардиз талукь малуматар вичин рахунра ЦРБ-дин кьилин духтур Жафер Къурбанисмаилова гана.

Ада къейд авурвал, алай вахтунда райондин здравоохраненидин хиле 636 пешекарди — 94 духтурди, 338 кас юкьван медперсоналди ва 205 кас гъвечIи медперсоналди — кIвалахзава. Штатдин бинедаллаз, райондин здравоохраненидин хиле 137 пешекардин игьтияж ава. Агьалийриз медицинадин ре­кьяй­ тамамдаказ къуллугъ авун патал отола­ринголог, травматолог-ортопед, аялрин эндо­кринолог, психиатрар, кардиологар, анестезиолог-реаниматолог, стационардин хирург, участковый терапевтар, педиатрар, инфекционист, трансфузиолог, функциональный диагностикадин духтур бес жезвач.

Райондин ЦРБ-дин руководстводи здравоохраненидин хел герек пешекарралди таъминарун патал тайин кIвалах тухузва. Мисал­ яз, СтIал Сулейманан райондай тир студент­ри кIелзавай медицинадин вузрихъ галаз виликамаз икьрарар кутIунзава. Идалайни гъейри, райондин мектебар акьалтIарзавай жегьилар медвузрик экечIун патални тайин тир серенжемар кьабулзава.

2015-йисалай инихъ ЦРБ-да 28 духтур кIвалахал кьабулна, гьа са вахтунда 29 кас кIвалахдилай элячIна. И кардин себебни духтурар “Земский духтур” программадай къунши районрин больницайра кIвалахал акъвазун, яшар хьайибур пенсиядиз экъечIун, бязибур ординатурадик экечIун хьана.

2011-йисалай 2022-йисалди здравоохраненидин къурулушда “Земский духтур” прог­раммадай 26 духтур кIвалахал акъвазна. Абурукай 6 кас, 5 йисуз зегьмет чIугуна, кIва­лахдилай элячIна.

ЦРБ-дин кьилин духтурди лагьайвал, районда медицинадин идарайра пешекарар бес тахьун ва бязи къуллугъчияр кIвалах­ди­лай элячIун абуруз гузвай мажибдин кьадар тIимил хьунихъ галаз алакъалу я.

Веревирд ийизвай месэладин гьакъиндай чпин фикирар ва теклифар гваз райондин кьилин заместитель Абуталиб Фатулаев, ФОМС-дин районрин уртах филиалдин регьбер Руслан Гьажимурадов, са шумуд хуьруьн администрацийрин кьилер рахана. Совещанидин нетижаяр Саид Темирханова кьуна.

Хазран Кьасумов