Алай вахтунда, вири уьлкведа хьиз, Дагъустандани декабрдин эхирралди, зулун призывдин сергьятра аваз, жегьилриз армиядин жергейра къуллугъ авуниз эвер гузва. Къейд ийин хьи, Ватандин вилик буржи тамамариз физвайбур рекье туниз талукьарзавай мярекатра абурун мукьва-кьилийрихъ галаз санал гьукумдин, жемиятдин тешкилатрин векилри, дяведин гьерекатрин ветеранри ва масабуру иштиракзава.
— Призывдин кампания чина пландин бинедаллаз кьиле физва, — лугьузва Дербент, Дагъустандин Огни шегьеррин ва Дербент райондин военный комиссар Фарид Мусаева. — Зулуз армиядин жергейриз 1995-2004-йисара хайибуруз эвер гузва. Эгер, тайин себебар аваз, са касдивай армиядин жергейра къуллугъ ийиз физ жезвачтIа, ахьтиндаз къанундалди тестикьарнавай отсрочка гузва.
Ф.Мусаеван гафарай малум хьайвал, Дербент, Дагъустандин Огни шегьеррин ва Дербент райондин военный комиссариатдиз, санлай къачурла, 300 касдиз эвер гуда. Повестка агакьнавай гьар са жегьил тайинарнавай юкъуз документарни гваз комиссариатдиз атун шартI я.
Армиядин жергейра къуллугъ авуниз (1 йисан къене) эвер гузвайбур Украинада кьиле физвай махсус серенжемдиз рекье твадач. Абуру Урусатдин мулкарал алай кьушунра къуллугъда. Къейд ийин хьи, мукьвара чи уьлкведик ахкат хъувунвай регионра авай кьушунризни рекье твадач.
Къагьриман Ибрагьимов
