Аслан Сафиханован кьегьалвал себеб яз, 2 офицерни 12 аскер сагъ амукьна
Украинада кьиле физвай махсус серенжемда иштиракзавай Мегьарамдхуьруьн райондин Филерин хуьруьн агьали Аслан Сафихановаз РФ-дин Президент Владимир Путинан Указдалди женгера къалурнавай кьегьалвилерай Георгий Жукован медаль гана. Идакай муниципалитетдин администрациядин пресс-къуллугъди хабар гузва.
Сержант Аслан Сафиханова серенжемда сад лагьай йикъалай иштиракзава. Мукьвара Херсондин областдин Малиновка хуьруьн патарив кьиле фейи дяведин гьерекатра, вичин уьмуьр хаталувилик кутуна, галай юлдашар кьиникьикай хвена. Урусатдин аскеррин десте винидихъ тIвар кьунвай хуьруьн патавай фидайла, нацистрин гьужумдик акатна. Гзафбурал хьиз, Асланални хер хьана, амма, и кардизни килиг тавуна, ада вичелай пис гьалда авай, масадан куьмекдихъ муьгьтеж юлдашар са-сад гъилераллаз тамуз тухвана ва куьмекдиз эвер гана. Жегьил сержантдин викIегьвал себеб яз, залан хирер хьанвай 2 офицерни 12 аскер сагъ амукьна.
Аслан Сафиханов Азербайжанда дидедиз хьана. 2000-йисуз Мегьарамдхуьруьн райондиз куьч хьана. Адан хизанда пуд аял чIехи жезва. Дирибаш сержантди Ватан хуьн гьар са ватанэгьлидин пак везифа яз гьисабзава.
Къейд ийин хьи, Аслан Сафиханов идалай виликни са шумуд сеферда РФ-дин оборонадин министерстводин шабагьриз лайихлу хьана.
Чи мухбир
