РД-дин Гьукуматдин Председателдин заместитель
яз кIвалахай Мухтар Межидоваз 5 йис кар атIана
Виликдай Дагъустандин Гьукуматдин Председателдин заместитель яз кIвалахай Мухтар Межидоваз талукь яз къарагъарай уголовный делодай судди къарар акъуднава. Идакай ТАСС-ди хабар гузва.
Чешмедин малуматралди, республикадин виликан вице-премьер пулдин чIехи такьатрихъ галаз алакъалу лутувал авунай тахсиркар тирди субутна. 5 йис кар атIунихъ галаз санал ам 900 агъзур манатдин кьадарда аваз жермени авуна. Ихьтин къарар Москва шегьердин Мещанский судди кьабулна. Гьа са вахтунда М.Межидоваз кьве йисни зуран вахтунда государстводин органра кIвалахун къадагъа авунва.
Ихтилат физвай уголовный делодин сергьятра аваз мад са касдиз талукь яз судди къарар акъудна: Избербаш шегьердин Плешакован тIварунихъ галай радиозаводдин виликан директор Фиряз Фармановаз шартIуналди 4 йис кар атIана ва ам 800 агъзур манатдин кьадарда аваз жерме авуна.
Чешмеди хабар гузвайвал, 2012-йисуз М.Межидова уьлкведин оборонадин министерстводин векилар Избербаш шегьердин радиозавод ведомстводин игьтияжар патал РСП-10МН маркадин самолетар ацукьдай радиолокационный къурулушар акъудиз гьазур тирдахъ инанмишарна. Гьакъикъатда лагьайтIа, карханадихъ абур арадал гъидай я тадаракар, я маса мумкинвилер авачир. Икьрардин бинедаллаз РФ-дин оборонадин министерстводи винидихъ тIвар кьур хьтин пуд къурулуш гьазурун патал 108 миллион манат пул чара авуна.
РикIел хкин, са шумуд йис идалай вилик М.Межидован хва Муртазали Межидовни суддин къарардин бинедаллаз азадвиликай магьрумна. Ам Москва шегьердин вузрикай сана кIелзавай Къазахстандай тир студентка кьинай тахсиркар тирди субутна ва адаз13 йис кар гана.
Чи мухбир
