Россиядин Яракьлу Къуватри Донбасс хуьн патал тухузвай военный махсус серенжемда СтIал Сулейманан райондайни цIудралди кьегьалри иштиракзава. Са шумудаз Россиядин Президент Владимир Путинан Указдалди орденар ва медалар ганва.
И мукьвара райадминистрацияда Саид Темирханов ва жавабдар маса ксар ЦIийи Мамрачрин хуьряй тир Росгвардиядин старший сержант Рамазан Гьадисовахъ галаз гуьруьшмиш хьана. Малум хьайивал, ада Москвадин областдин Балашиха шегьерда бинеламиш хьанвай военный частуна икьрардин бинедаллаз къуллугъ ийиз 6 йис я. Р.Гьадисова, взводдин командирдин заместитель яз, махсус серенжем башламиш хьайи сифте йикъарилай ана вичин буржи кьилиз акъудзава ва росгвардеецди женгинин са шумуд гьерекатда жуьрэтлувал къалурна. Командирдин везифаяр тамамарзавайди яз, Рамазаналай са женгина чи аскерар, са хкатунни авачиз, душмандин гьалкъадай акъудиз алакьна.
И викIегьвиляй Р. Гьадисоваз Георгийдин хаш гана. Р. Гьадисова райондин кьил Саид Мусиновичаз ва гуьруьшдин амай иштиракчийриз Донбассда кьиле физвай женгинин гьерекатрикай, вичин женгинин юлдашрикай, ихтилат авуна.
Саид Темирханова аскервилин буржидиз вафалувиляй ва Ватан кIан хьунай Р. Гьадисоваз сагърай лагьана ва вичин мурад ам, гьакIни махсус серенжемда иштиракзавай вири кьегьалар сагъ-саламатдиз кIвалериз хтун тирди къейдна.
Саид Темирханова Гьадисоврин хизандивай дерди-гьални жузуна. С.Темирханов махсус серенжемда иштиракна кIвализ хтанвай НуьцIуьгърин хуьряй тир Ферзилагь Мегьамедован патавни фена. Малум хьайивал, 38 йис яш хьанвай Ф.Мегьамедовал 4-ноябрдиз Донецкдин областда са женгина, миллетчийрин гьалкъадай экъечIдайла, хер хьана. Смоленскдин госпиталда хер сагъар хъувурдалай гуьгъуьниз ам ял ягъун ва сагъламвал мягькемар хъувун патал кIвализ ахъайна.
Ф.Мегьамедова райондин кьил Саид Темирхановаз лагьайвал, ял ягъайдалай гуьгъуьниз ам Донбассдиз хъфида, махсус серенжемда вичин буржи кьилиз акъудун давамарда. Кьегьал хва тербияламишунай С.Темирханова Рафижат ва Юнус Мегьамедовриз, Ферзилагьаз сагърай лагьана.
Райондин кьили Мегьамедоврин хизандин дерди-гьалдикайни хабар кьуна, гьар са карда куьмек гуз гьазур тирди къейдна. ИкI, Мегьамедоврин хизандин тIалабун кьилиз акъудун яз, Ферзилагьан уьмуьрдин юлдаш Карина хуьруьн аялрин бахчада кIвалахал эцигна.
Ф.Мегьамедова военный махсус серенжемда иштиракзавайбурун ва абурун хизанрин гьакъиндай къайгъударвал авунай Саид Мусиновичаз чухсагъул лагьана.
Хазран Кьасумов
