Россиядин Федерациядин Госдумадин депутат  Гьажимет  Сафаралиев  РД-дин рушарин боксдин Федерациядиз мугьман хьана.

Гуьруьшда Махачкъала ше­гьердин администрациядин спортдин, туризмдин ва жегьилрин­ кра­рин рекьяй комитетдин пред­се­датель Марат Ибрагьимова, Каспийск шегьердин собранидин спорт­дин рекьяй комиссиядин председатель Раидин Исмаилова ва масабуру иштиракна.

Гуьруьшдин макьсад респуб­ликада дишегьлийрин бокс вилик тухунин рекьер-хуьлер веревирд авун тир. КIватI хьанвайбурун вилик ­Гьажимет Сафаралиев инсандин уьмуьрда спортдин важиблу­ви­ликай рахана. Ада кьилди спортдин боксдин жуьредикайни суьгьбетарна

— Им гьакъикъатдани кьетIен школа я. Дагъустан Республикада, малум тирвал, кьуршахар кьун вилик ква. Гила дуньяда дишегьлийрин спорт вилик физ эгечIнава. И кар фикирда кьуна, чи республикадани дишегьлийрин спорт вилик тухуз башламишун тарифиз жедай кар я, — лагьана депутатди.

Россиядин ва дуьньядин чемпион Земфира Мегьамедалиевади  республикада дишегьлийрин пешекар спорт вилик тухуниз фикир гунай Госдумадин депутатдиз сагърай лагьана.

— Ихьтин чIехи мугьманар чи патав­­ атун, куьмекар гун чун патал кар алай кIвалах я. Гьайиф хьи, пул­дин такьатар тахьуниз килигна, чун са жерге турнирра иштирак та­ву­низ маж­бур жезва. Спортсмен па­тал гьар са акъажун — им пешедин жи­­гьет­дай вилик фин я, — къейд­на боксёрди.

Гуьруьшдин эхирдай спортсменри депутатдиз чпин къулар чIу­гунвай боксдин бегьлеяр багъишна.

Дагъви Шериф