31-майдиз Ахцегьа “Ахцагь” стадиондал футболдай дуствилин къугъун кьиле фена. Райондин вири хуьрерин векилрикай ибарат хкянавай команда “Ахцагьдихъ” галаз гуьруьшмиш хьана. Дуствилин къугъун 2:2 гьисабдалди акьалтIна. Итижлу и къугъуниз килигиз атанвайбурни самбар авай — абурун жергеда “Ахцагьдик” кваз гьар жуьре йисара къугъвай, къе чпи районда ва республикада гьар жуьре къуллугърал кIвалахзавайбурни.
Районда футболдал рикI алайбур, хъсандиз футбол къугъвадайбур кIватIунин кьилин макьсад, бажарагъ авай жегьилар хкягъун, гьар жуьре месэлайрай меслятар авун тир.
Гъедрен азан гана. КIватI хьанвайбур суфрадихъ ацукьна. Дуьаяр кIелайдалай, сив хкудайдалай кьулухъ футболистри чпин тIал алай месэлайрай суьгьбетарна.
РикIел хкин, мукьвал тир вахтунда футболдай Дагъустандин чемпионат башламишда. Аниз Ахцегьрин команда хтун спонсорвилин куьмекрихъ галаз алакъалу я. Гьелелиг райадминистрациядихъ командади акъажунра иштиракун патал харжар ийидай такьатар авач.
Яшайишдин ва спортдин месэлаяр веревирдунин ихьтин серенжем Ахцегьрин командада къугъвай Мегьамед Алишеван, “Дагтехкадастр” ГБУ-дин директор Шамил Алиеван, “Ахцагь” командадин тренер Камил Гьажиеван куьмекдалди тешкилайди я.
Эхирдай Камил Гьажиева районда футболдин гележегдикай вичин фикирар раижна ва и серенжемда иштиракай гьар садаз сагърай лагьана.
Дагъви Шериф
