И йикъара 78 йисан яшда аваз, яргъалди чIугур залан азардикди чи газетдихъ галаз фадлай алакъа хуьзвай мухбир ва шаир, чIехи хизандин диде ва баде Ингилжагьан Алистанова рагьметдиз фена.
И.Алистанова 1940-йисуз Докъузпара райондин Гъугъанрин хуьре (гила Мегьарамдхуьруьн райондин Азадогъли хуьр) дидедиз хьана. Ана ирид йисан школа, Дербентда гамар храдайбурун курсар, Махачкъалада хуьруьн майишатдин техникум акьалтIарна, шегьердин жуьреба-жуьре карханайра зегьмет чIугуна.
Гьеле аял чIаварилай ада шиирарни теснифзавай, абур “Дагъустандин дишегьли”, “Самур”, “Кард” журналра, республикадин ва районрин газетра чапзавай.
Чи гъиле адан шииррин “Дадлу емишар”, “Чидачир заз”, “РикIин хиялар”, “Тади квай гатфар”, “Мулдин цуьквер” ва маса ктабар ама.
Ктабрин тIварарайни аквазвайвал, Ингилжагьан тIебиатдал, инсанрин хъсан крарал, сидкьидин рафтарвилерал ашукь тир. Лап гзаф цIарар михьи муьгьуьббатдин гьиссериз бахшнава.
Амма ажалдиз мажал чидач.
Чна Ингилжагьан Алистановадин веледриз, хтулриз, вири багърийриз башсагълугъвал гузва. Адан экуь къамат чи рикIелай садрани алатдач.
«Лезги газетдин» редакциядин коллектив
