ГъвечIи чIавалай далдам ягъунал машгъул Мягьедин Муртазалиева Ахцегь райондин музшколада муаллимвиле кIвалахиз хейлин йисар я. Адан рагьметлу буба Агьмед халуни хъсан далдамчи тир.
Школа куьтягьайдалай гуьгъуьниз ам вичин пак буржи тамамарун патал армиядин жергейриз фена. Аскервиляй хтай М.Муртазалиева Махачкъаладин кьуьлеринни манийрин ансамблда 5 йисуз концертмейстервиле кIвалахна. 1996-йисуз Каспийск шегьердин музыкадинни хореографиядин лицейда муаллимвална.
Ватандиз хтай ада къедалди райондин музшколада аялриз далдам ягъунин сирер чирзава. Адан хъсан ученикрикай Шемсидин Садыхован, Сабина Мамедовадин, Рамазан Алиеван, Адам Залбегован, Мегьамед Гъаниеван, Мурад Муртазалиеван, Мадина Магьарамовадин ва масабурун тIварар кьаз жеда. Аялар райондин ва республикадин дережадин конкурсриз хъсандиз гьазурунай ам са шумудра гьуьрметдин грамотайриз, къиметлу пишкешриз лайихлу хьана.
Вичин чирвилерин дережа хкажун патал алай вахтунда М.Муртазалиева заочнидаказ Махачкъаладин культурадин колледжда кIелзава. Ада вердишарай Хийируллагь Муртазалиев, Эльдар Эфендиев, Амран Сулейманов, Рамазан Балалиев ва масабур райондин ва Махачкъаладин мектебра кIвалахзавай, мехъеррик иштиракзавай хъсан музыкантар яз машгьур хьанва.
Къуй Мягьедин муаллимдихъ ва адан ученикрихъ гележегдани еке агалкьунар хьурай!
Рагьидин Эминов
