Сергей Меликова Валентина Матвиенкодиз  алай йисуз

Дагъустандихъ экономикадин рекьяй хьанвай агалкьунрикай лагьана

13-декабрдиз Москвада Федерациядин Советдин Председатель Валентина Матвиенкоди РД-дин Кьил Сергей Меликовахъ галаз гуьруьш кьиле тухвана. Идакай “Лезги газетдиз” республикадин Кьилин пресс-къуллугъди хабар гана.

Гуьруьшдин сергьятра аваз Дагъустан экономикадинни яшайишдин жи­гьет­дай вилик финин, цIи Урусатдик акат хъувунвай цIийи регионрин агьалийриз жуьреба-жуьре рекьерай куьмекар гунин, Украинада кьиле физвай махсус се­ренжемдин иштиракчийриз недай-хъвадай суьрсет, парталар, герек маса затIар рекье тунин месэлаяр веревирдна.

Валентина Матвиенкоди Сергей Меликовавай Дагъустанда авай гьаларикай, чкадин агьалийрик къалабулух кутазвай месэлайрикайни хабар кьуна.

Экономикадин рекьяй вилик финикай рахадайла, республикадин Кьили и жигьетдай хьанвай агалкьунрикай ихтилатна:

“Йис чна яшайишдин жуьреба-жуьре ­хилерай хъсан нетижаяр къазанмишу­налди акьалтIарзава. Иллаки агросектор къейд ийиз кIанзава. Мукьвара чна Ма­хач­къаладин кьилин майдандал чIехи мекера тешкилнавай. Аниз Дагъларин уьл­кведин вири районрин хуьруьн майишатдин карханайри чпин продукция гъанвай. ЦипицIар кIватI хъувунин жигьетдай республикадихъ иллаки еке агалкьунар хьанва…”,  — хабар гана Сергей Меликова.­

Республикадин АПК-дин агалкьунриз виниз тир къимет гуналди, Валентина Матвиенкоди промышленностдин хелни хъсандиз вилик тухун герек тирди къейдна.

Чи мухбир