(Эхир. Эвел — 46-48-нумрайра)
И гьадисдикай тарс къачун яз, са мусурман стха сефил акурла, адалай а сефилвал алудиз алахъна кIанда. Са мусурман стха буржара гьатнаваз акуртIа, адаз алакьдай са куьмек гун герек я. Эгер са мусурмандиз маса мусурман буржлу ятIа, кIевевайдаз регьятвал гун хъсан я: бурж вахкун патал чара авунвай вахт давамар хъийиз жеда, мумкинвилериз килигна, буржуникай тайин са пай гьалал авунни еке суваб авай кар я.
Гьадисда гьакIни лугьузва хьи, ни вичин мусурман стха и дуьньяда кIеви авуртIа, Аллагьди ам и дуьньядани кIеви ийида, агъа дуьньядани. Мисал яз, са мусурманди масадбуруз зиян хкат тийизвай гунагь кар ийизва, яни анжах са вичиз талукь тир гунагь. Ада авунвай гунагь кар акурла, адакай идаз-адаз ахъаюн хъсан туш, акси яз, адан гунагь чуьнуьхна кIанда. Мад ахьтин кар хъувун тавун патал адаз кьилди, маса кас алачир чкадал и кардикай лагьана кIанда. Эгер и къайдада авуртIа, Аллагьди Къияматдин Юкъуз ахьтин кас беябурдач. Садазни вич беябурдай са себебни авачирди хьиз хьана кIандач, ахьтин крар виридахъ авайди я.
Пайгъамбарди (Аллагьдин патай салават ва салам хьуй вичиз) гьакIни лугьузва хьи, ни вичин диндин стхадиз куьмек гуз хьайитIа, адаз Аллагьдини куьмек гуда. ГьакI хьайила, къуй гьар са кас вичин мусурман стхадиз куьмек гуз алахърай, ахьтиндаз Аллагьдини куьмекда. Аллагьдин куьмекдилай зурба мад вуч жагъида кьван инсандиз?! Къуй Аллагьди чун кьве дуьньядани Вичин регьимдик кутурай ва чун чи стхавилин буржияр кьилиз акъуддайбурукай авурай! Амин!
Гьасамудин Сефибегов,
ДаркIушрин хуьруьн мискIинда худбаяр кIелзавайди
