И йикъара Москвада “Пак Къуръан ва адан манайрин таржума лезги чIалал” ктабдин пуд лагьай издание (тираж — 1000 экземпляр) чапдай акъатнава. И кардиз пулдин такьатар Алкьвадар Гьасанан тIварунихъ галай медениятдинни марифатдин центради чара авуна.
Къейд ийин хьи, тираж Дагъустандиз хканва. Къуръандин аятрин манаяр лезги чIалал кIелиз кIанзавайбурувай ктаб “Лезги газетдин” редакциядай, Махачкъалада авай Ислам диндин туьквенрай маса къачуз (къимет — 1100 манат) жеда.
МискIинризни медресайриз Къуръандин аятрин манайрин таржума гьавая гузва. Диндин идарайрин векилривай ктаб пулсуздаказ Махачкъалада “Лезги газетдин” редакциядайни винидихъ тIвар кьур центрадин офисдай вахчуз жеда.
Къуръандин аятрин манаяр сифте яз лезги чIалаз таржума авунвайди диндин алим, бине Ахцегь райондин Луткунрин хуьряй тир Ямин гьажи Мегьамедов я. Адан къелемдикай лезги чIалал Ислам диндин месэлайриз талукь мад са шумуд ктаб хкатнава.
РикIел хкин, цIи “Пак Къуръан ва адан манайрин таржума лезги чIалал” ктаб 10 агъзур экземплярдин тираж аваз Саудиядин Аравиядин Медина шегьерда авай Пак Къуръан чапзавай Фагьд пачагьдин тIварунихъ галай комплексдани акъатнава.
Чи мухбир
