Накь чав туькьуьл хабар агакьна: хейлин йисара милли редакцияда зегьмет чIугур, ХХ асирдин 80-йисара лезги халкьдин тарих гьейранвалдай шикилралди кхьей, ватанэгьлийрин кьисметрин, крарин, агалкьунрин нетижа гуьзел къаматра тунвай итижлу архив арадал гъайи кас, бажарагълу фотожурналист Тажидин Мегьамедов залан азардикди 83 йисан яшдаваз рагьметдиз фена.
Т.Мегьамедов Кьасумхуьруьн райондин Вини СтIалрин хуьре 1940-йисуз дидедиз хьана. Сифтегьан школа хуьре куьтягьай жаванди 1952-1959-йисара юкьван образование Каспийск шегьердин школа-интернатда къачуна.
Советрин Армиядин жергейра къуллугъна хтайла, ада Каспийскдин “Дагдизель” заводда токарвиле кIвалахна. 1964-йисуз Мегьамедов Дагъустандин госуниверситетдин къецепатан чIаларин факультетдик экечIна. КIелзавай вахтунда ва гуьгъуьнлайни адакай “Дагъустандин университет” газетдин корреспондент хьана. Хизандин иеси хьайидалай гуьгъуьниз ада цIикьвед йисуз кьван меркездин жуьреба-жуьре идарайра зегьмет чIугуна.
1988-йисуз адаз “Лезги газетдин” редакцияда кIвалахун теклифна. Пенсиядиз экъечIдалди Тажидина фотокорреспондентвилин везифаяр чешнелудаказ кьилиз акъудна. И йисара ам неинки Кьиблепатан Дагъустандин районриз, хуьрериз, гьакI республикадин вири мулкариз фена, газет патал гьар санай уьмуьрдин гьакъикъат къалурзавай жанлу шикилар, хъсан макъалаяр хкана.
Газетда “Тажидинан тавханада” рубрикадик кваз акъатзавай шикилри гьар сад гьейранарзавай. Инсанрин, тIебиатдин, мярекатрин, вакъиайрин шикилар кIелзавайбуру хушдиз кьабулзавай. Гьар са шикилдай вичин мана, гуьзелвал, къилих, тарих, ацукьун-къарагъун, алукIунар, сеняткарвилер, тIебиатдин девлетар аквазвай. Абур шикилрин чIалалди кхьенвай чIехи эсерриз ухшамиш тир. Тажидин Мегьамедова шикилралди уьмуьрдикай вичин мани лагьана. А мани рикIелай алат тийидайди, несилрилай несилрал фидайди я. И кардин гьакъиндайни республикадин меркезда, Каспийскда, Дербентда, Ахцегьа, Кьасумхуьрел ва масанра тешкилай ва агьалийри пара хушдиз кьабулай адан шикилрин выставкайри шагьидвалзава.
ВинистIалвиди вич хъсан юморист, гьикаятчи тирдини успатна. Лезги ва урус чIаларал акъатай адан “Кузовдай тир хан”, “Тажидинан тавханада”, “Гьуьрметдани, гьуьрметдачни”, “Дуьньядин дяве зи челегда”, “Лезги писателрин портретар” ктабар кIелзавайбуру хушдаказ кьабулна.
Чна Тажидин Мегьамедован багърийриз, мукьва-кьилийриз, ярар-дустариз, адан яратмишунрал рикI алай вирибуруз, дериндай хажалат чIугуналди, башсагълугъвал гузва.
«Лезги газет»
