Ноябрдин эхирра Ахцегьрин 1-нумрадин юкьван мектебдин спортзалда райондин мектебрин 5-8-классрин аялрин арада мини-футболдай “Школадин лигадин” акъажунар кьиле фена. Къейд ийин, Россиядин футболдин Союзди (РФС) кьил кутур и проектдиз Дагъустанда РФ-дин спортдин, РД-дин образованидин ва илимдин министерствойри ва республикадин футболдин Федерацияди Ахцегь районда и проектдин сергьятра аваз акъажунар футболдин “Ахцагь” ДЮСШ-дин муаллимрин куьмекдалди муниципалитетдин администрациядин образованидин управлениди тешкилна.
Акъажунра кьуд мектебдай (Ахцегьрин 1, 2-нумрайрин, Луткунрин ва КьакIарин хуьрерин СОШ-ар) 150-далай артух аялри иштиракна.
Вад юкъуз давам хьайи акъажунрин нетижада 5-классрин арада 1, 2 ва 3-чкаяр Луткунрин, Ахцегьрин 1-нумрадин ва КьакIарин юкьван мектебрин командайри кьуна. 6-классрин арада Ахцегьрин 2- нумрадин, КьакIарин ва Луткунрин мектебар, 7-классрин арада Ахцегьрин 2, 1-школаяр ва Луткунрин СОШ, 8-классрин арада Ахцегьрин 1-нумрадин, Луткунрин ва КьакIарин школаяр тафаватлу хьана. Гъалиб хьайи командайриз образованидин управленидин патай гьуьрметдин грамотаяр гана.
1-чкаяр кьур кьуд командади Мегьарамдхуьре акъажунрин зонадин паюна иштиракда.
Дашдемир Шерифалиев
