А.Гьасанан тIварунихъ галай медениятдинни марифатдин

центради Кьулан СтIалрин хуьряй тир Пирмегьамедоврин

хизанди лезги чIал хуьник пай кутун къейдна

4-декабрдиз Махачкъалада Алкьвадар Гьасанан тIварунихъ галай медениятдинни марифатдин центрадин активдин алай йисан эхиримжи заседание кьиле фена. Ана ДГУ-дин профессор Омар Гьуьсейнова, ДГПУ-дин профессор Шайдабег Мирзоева, РД-дин Общественный палатадин комитетдин председатель Ислам Мегьамедова, РД-дин Росреестрдин Управленидин регьбер Арсен Пирмегьамедова, РД-дин Халкьдин Собранидин депутат Марат Алиярова, Каспийск шегьердин мэрдин заместитель Арсен Шерифова, меценат Мурад Мегьамедкеримова ва масабуру иштиракна.

Мярекатдин эвел кьиляй центрадин директор, “Лезги газетдин” кьилин редактор Мегьамед Ибрагьимова мукьвара рагьмет­диз фейи РД-дин Халкьдин Собранидин депутат Ильман Алипу­латован экуь къамат рикIел хкана, центрадин тIварунихъай адан мукьвабуруз мад сеферда  башсагълугъвал гана. Гуьгъуьн­лай ада “Лезги-урус гафарган” чапдай акъудуниз пулдин такьатар ча­ра авур СтIал Сулейманан тIварунихъ галай райондин Кьулан СтIалрин хуьряй тир Пирмегьамедоврин хизандиз хайи чIал хуьник ва вилик тухуник лайихлу пай кутунай сагърай лагьа­на ва и хизандин векил Арсен Пирмегьамедовав центрадин патай Разивилин чар вахкана.

Заседанидин сергьятра аваз М.Ибрагьимова хабар гайивал, Алкьвадар Гьасанан тIварунихъ галай медениятдинни марифатдин центрадин официальный сайт кардик акатнава. Идахъ галаз сад хьиз, социальный сетра центрадин хсуси аккаунтарни арадал гъанва.

Ноябрдин вацра кьиле тухванвай кIвалахрикай рахадайла, М.Ибрагьимова центради Ахцегь райондин мектебра кIелзавайбу­­­рун арада, Гьажибег Гьажибегован 120 йис тамам хьунин сер­гьят­ра аваз, лезги публицистикадай конкурс кьиле тухвайди ри­кIел хка­на ва виридаз 8-декабрдиз, Гь.Гьажибегован юбилейдиз та­лу­кьарна, Махачкъалада кьиле фидай мярекатдиз атун теклифна.

Заседанидал гьакIни центрадин кIвалахдин асул пуд пай ва абурун кьиле акъваздай жавабдар ксарни тайинарна. ИкI, медениятдинни марифатдин хилерай кьиле тухудай кIвалахдиз Шайдабег Мирзоева регьбервал гуда, яшайишдинни экономикадин месэлаяр машгьур прозаик Якьуб Яралиеван хва Мурад Яралие­вал ихтибарна ва пуд лагьай — малуматрин (информационный) хел журналист Малик Бутаеван гуьзчивилик жеда.

Заседанидин иштиракчийри гьакIни къведай йисан 1-паюна центради кьиле тухудай мярекатрин планни веревирд авуна. Мисал яз, 2023-йисуз Махачкъалада ва Кьиблепатан Дагъустандин районра лезги медениядинни эдебиятдин векилрин юбилеяр къейдда, лезги чIалаз талукьарнавай олимпиада, ДГУ-дин ва ДГПУ-дин филологиядин факультетра кIелзавай студентрин арада лезги публицистикадай конкурс, Етим Эминан ирсиниз талукьарна, республикадин дережада аваз “Эминовские чтения” лишандик кваз эдебиятдин рекьяй акъажунар ва маса мярекатар кьиле тухун фикирдиз къачунва.

Заседанидал са жерге маса месэлайриз талукь теклифарни гана. Кьилди къачуртIа, Омар Гьуьсейнова центради ДГУ-диз Да­гъустандин халкьдин шаир СтIал Сулейманан тIвар хгун патал­ серенжемар кьабулун герек тирди къейдна, Шайдабег Мирзоева Дагъустандин министерствойрани ведомствойра кIвалах­завай чи ватанэгьлийрин махсус сиягь (реестр) гьазурун, Арсен Шери­фова яшайишдин жуьреба-жуьре хилерай Дагъустанда кьилиз акъудзавай федеральный ва региондин метлеб авай проектра лезги районрини активнидаказ иштиракун патал центрадин векил­ри Кьиблепатан Дагъустандин муниципалитетрин кьилерихъ галаз гуьруьшар тухун теклифна. Иштиракчияр и пуд месэладайни­ кIвалах тешкилдай фикирдал атана ва жавабдар ксарни тайинарна.

Мярекатдин эхирдай Мегьамед Ибрагьимова къейд авурвал, 2023-йисан сад лагьай заседание ЦIийи йисан суварихъ галаз алакъалу яз, ял ядай йикъар куьтягь хьайидалай гуьгъуьниз кьиле тухуда.

Агьмед Магьмудов