6-декабрдиз Дагъустандиз СКФО-да РФ-дин Президентдин Векил Юрий Чайка мугьман хьанвай. Махачкъаладин аэропортуна ам республикадин Гьукуматдин Председатель Абдулмуслим Абдулмуслимова кьабулна.
“Лезги газетдиз” РД-дин Гьукуматдин пресс-къуллугъди хабар гайивал, сифте нубатда Ю.Чайкадини А.Абдулмуслимова Дагъустан яшайишдинни экономикадин жигьетдай вилик финин месэлаяр веревирдна.
Гуьгъуьнлай абур республикадин меркезда князь Александр Невскийдин тIварунихъ галай килиса эцигзавай чкадал фена ва килисадин дараматдин къандахда сифте къван эцигуниз талукьарнавай мярекатда иштиракна. Къейд ийин хьи, 6-декабрдиз Урусрин Православный килисадин Махачкъаладин епархия арадал гъайидалай инихъ 10 йис тамам хьана. Мярекатдин сергьятра аваз А.Абдулмуслимова республикада яшамиш жезвай хашпара диндин векилрин тIварунихъ рекье тунвай Тебрикдин тел кIелна.
Дагъустанда мугьманда авай чIавуз Юрий Чайка Абдулмуслим Абдулмуслимовахъ галаз Махачкъаладин Свято-Успенский кафедральный собордизни фена. Ина абур килисадин къуллугъчийрихъ галаз гуьруьшмиш хьана ва Ю.Чайкади Урусатдин жемиятдин руьгьдинни ахлакьдин ивирар хуьник кьетIен пай кутунай архиепископ Варлаамав СКФО-да РФ-дин Векилдин патай Разивилин чар вахкана.
СКФО-да РФ-дин Векилдин патай Разивилин чарчиз гьакIни РД-дин МВД-дин кьил Абдурашид Мегьамедовни лайихлу хьана. Шабагь вахкудайла, Юрий Чайкади Дагъустандин къенепатан крарин министр къуллугъдин рекьяй везифайрив намуслувилелди эгечIзавайди къейдна ва кIвалахдин рекье ведомстводихъ агалкьунар хьун алхишна.
6-декабрдиз Юрий Чайкади гьакIни Къаякент райондин Первомайское хуьряй тир гзаф аялар авай Къурбановрин хизандихъ галаз гуьруьш кьиле тухвана. Гуьруьшдин сергьятра аваз ада Къурбановрин хизандив “Диде-бубадин баркалла” орден вахкана. Къейд ийин хьи, государстводин и шабагь ирид ва адалай гзаф аялар чIехи жезвай хизанриз гузва.
Чи мухбир
