7-декабрдиз РД-дин Гьукуматдин Председатель Абдулмуслим Абдулмуслимова “Минский тракторный завод” ОАО-дин векилрихъ галаз гуьруьш кьиле тухвана. Идакай “Лезги газетдиз” республикадин Гьукуматдин пресс-къуллугъди хабар гана.

Гуьруьшдин иштиракчийри промышленностдин, хуьруьн майишатдин рекьерай кьве республикадин арада авай амадагвилин алакъайриз, техника цIийикIа туькIуьр хъувун патал Дагъустанда “МТЗ” ОАО-дин сервисдин центр ачухуниз талукь месэлаяр веревирдна.

А.Абдулмуслимова къейд авурвал, Дагъустанда Минскдин тракторрин заводди акъудзавай техникадикай гегьеншдиз менфят къачузва. Гьар йисуз республикадин хуьруьн майишатдал машгъул жезвай карханайри и заводдин 50-100 трактор маса къачузва.

Къейд ийин хьи, Белоруссиядин карханадин векилар Дагъустанда са шумуд юкъуз амукьда. Абур региондин промышленностдин ва хуьруьн майишатдин са шумуд карханадиз мугьман жеда. Абурун арада “Татляр” агрофирма, Нариман Алиеван тIварунихъ галай АО ва масабур ава.

«Лезги газет»